ԵՐԵՎԱՆ, 8 հուլիսի – Sputnik. Ծանր հիվանդությամբ կալանավորներն ու դատապարտյալներն ազատության իրավունք կստանան: ՀՀ Ազգային ժողովն այսօր արտահերթ նիստում երկրորդ ընթերցմամբ և ամբողջությամբ ընդունեց «ՀՀ քրեական դատավարության օրենսգրքում» լրացումներ կատարելու մասին» օրենքի նախագիծը, որով առաջարկվում էր կալանքի ու պատժի կրմանը խոչընդոտող ծանր հիվանդության հիմքով ազատ արձակելու հնարավորություն:
Մինչ քվեարկությունը ՀՀ արդարադատության նախարարի տեղակալ Սրբուհի Գալյանը նշեց, որ նոր օրենքով նախատեսվում է վարույթի նկատմամբ հսկողություն իրականացնող դատախազի միջնորդագիրը քննել անհապաղ: Դատարանն այն բավարարելու կամ մերժելու համար պարտավոր է նիստ գումարել 1-2 օրվա ընթացքում:
Պաշտոնական վիճակագրության համաձայն` 2020 թվականի հունվարից ՀՀ քրեակատարողական հիմնարկներում գրանցվել է մահացության 3 դեպք, որից 2 ը՝ ծանր հիվանդության հետևանքով:
Խորհրդարանն այսօր արտահերթ կարգով հավանության արժանացրեց նաև կառավարության ներկայացրած «Պետական նպաստների մասին» Հայաստանի Հանրապետության օրենքում փոփոխություններ կատարելու մասին օրենքի նախագիծը:
Դրանով ընդլայնվում է ժամանակավոր անաշխատունակության նպաստ ստացող քաղաքացիների ցանկը: Նոր կարգավորմամբ երեխայի նպաստի իրավունք կստանան նաև միկրոձեռնարկատիրության սուբյեկտ համարվող գործատուի վարձու աշխատողները, որոնք նախկին օրենքում ներառված չէին:
«Կոշ» ՔԿՀ-ի դատապարտյալներից մեկի մոտ կորոնավիրուս է հայտնաբերվել
Այսուհետ նրանք կկարողանան օգտվել մինչև երկու տարեկան երեխայի խնամքի, իսկ հիվանդության դեպքում՝ ժամանակավոր անաշխատունակության նպաստի իրավունքից:
