ԵՐԵՎԱՆ, 13 հուլիսի - Sputnik. Գերմանիայում ՀՀ դեսպանությունից հայտնում են, որ Գերմանիայից բժիշկների հումանիտար առաքելությունն ուղևորվել է Հայաստան։
«Հուլիսի 13-ին մեկնարկեց գերմանացի բժիշկների և առողջապահության համակարգի մասնագետների խոշոր պատվիրակության երկշաբաթյա հումանիտար առաքելությունը Հայաստան: Առաքելությունը կազմակերպվել է Գերմանիայի դաշնային կառավարության կողմից՝ գերմանական ISAR Միջազգային որոնողական և փրկարար կազմակերպության, Caritas International կազմակերպության և Ռոբերտ Կոխ ինստիտուտի հետ համատեղ»,–նշված է Facebook–ում դեսպանության էջում։
Հայաստանում գտնվելու ողջ ընթացում գերմանացի մասնագետները Հայաստանի մի քանի հիվանդանոցներում կաջակցեն հայ բժիշկներին կորոնավիրուսի համավարակի դեմ պայքարում, կկիսվեն այս ոլորտում գերմանական օրինակելի փորձով:
Հիշեցնենք, որ հունիսի 19–ին Հայաստան էր ժամանել լիտվացի բժիշկների և մասնագետների թիմը, նրանք իրենց հետ բերել էին 1,5 տոննա բուժսարքավորումներ ու պարագաներ։
Բացի այդ, արդեն իսկ Հայաստան են ժամանել ֆրանսիացի մասնագետներ։
Ակնկալվում է, որ Ռուսաստանից ևս կժամանեն ավելի քան 50 բժիշկներ: Մարդասիրական օգնություն է ուղարկվել նաև Լեհաստանից և Սերբիայից։
Հայության անունից` շնորհակալություն. ՀՀ նախագահն ընդունել է լիտվացի բուժաշխատողներին
