ԵՐԵՎԱՆ, 17 հուլիսի – Sputnik. ՀՀ վարչապետ Նիկոլ Փաշինյանը ՀՀ ԶՈւ գլխավոր շտաբի նախկին պետ, գեներալ-լեյտենանտ Արտակ Դավթյանին նոր պաշտոն է տվել։
«Ղեկավարվելով «Հանրային ծառայության մասին» Հայաստանի Հանրապետության օրենքի 9-րդ հոդվածի 7-րդ մասով՝ Արտակ Դավթյանին նշանակել ռազմարդյունաբերության կոմիտեի նախագահ»,–նշված է Փաշինյանի որոշման մեջ։
Հիշեցնենք, որ հունիսի 8-ին Արմեն Սարգսյանի հրամանագրով աշխատանքից ազատվել էր ԶՈւ ԳՇ պետ, գեներալ-լեյտենանտ Արտակ Դավթյանը։ Նույն օրն էլ այդ պաշտոնում նշանակվել էր գեներալ-լեյտենանտ Օնիկ Գասպարյանը։
Ռազմարդյունաբերության կոմիտեի նախագահի պաշտոնը թափուր էր մնացել այս տարվա փետրվարից, երբ Փաշինյանի որոշմամբ Ավետիք Քերոբյանն ազատվել էր պաշտոնից։ Այս տարվա հունվարի 8-ին Քերոբյանը ՀՀ վարչապետի որոշմամբ ենթարկվել էր կարգապահական տույժի՝ աշխատանքային պարտականությունները ոչ պատշաճ կատարելու համար: