ԵՐԵՎԱՆ, 20 հուլիսի – Sputnik. Վերջին երկու ժամվա ընթացքում հարյուրավոր փոխանցումներ են եղել Զինծառայողների ապահովագրության հիմնադրամին: Տեղեկությունը հայտնում է ՀՀ վարչապետ Նիկոլ Փաշինյանը:
Այսօր առավոտյան վարչապետը Facebook-ում գրել էր, որ բանակին աջակցություն ցուցաբերել ցանկացողները կարող են նվիրատվություններ փոխանցել Զինծառայողների ապահովագրության հիմնադրամին նաև օնլայն եղանակով:
«Շնորհակալ եմ, սիրելի հայրենակիցներ: Սա ոչ միայն նյութական, այլև շատ ավելի մեծ բարոյական աջակցություն է մեր բանակին, մեր պետությանը,- Facebook–ում գրել է նա՝ մեկ անգամ ևս խնդրելով ձեռնպահ մնալ բանակի համար որևէ գույք ձեռքբերելու նախաձեռնությունից,– այդ գույքի համար ծախսվելիք գումարը պարզապես փոխանցեք Զինծառայողների ապահովագրության հիմնադրամին, որի գործունեությունը լիարժեք թափանցիկ է և գտնվում է օրենքով նախատեսված վերահսկողության ներքո»։
Փաշինյանը նաև հրապարակել է հիմնադրամի կայքի հղումը, որով ցանկացողները կարող են ծանոթանալ նվիրատուների ցանկին, փոխանցված գումարների չափին: Այս պահին հիմնադրամի կայքում 20.07. 2020թ-ի ամսաթվով փոխանցումներ կատարողների թիվը 310 է:
Բայց վարչապետի կոչին նախորդած օրերին ևս փոխանցումներ են եղել, ընդ որում` ոչ միայն ՀՀ քաղաքացիներից, այլև արտերկրում բնակվող հայերից:
Հիմնադրամի կայքը թույլ է տալիս փոխանցում կատարողներին նաև ուղերձ հղել հայոց բանակին: Բազմաթիվ փոխանցողներ, օգտվելով այդ հնարավորությունից, իրենց բարեմաղթանքներն են ուղղել ՀՀ սահմաններն անառիկ պահող զինվորներին:
«Մինչև մեր վերջին շունչը, աշխարհի որ ծայրում էլ լինենք, ամբողջ ընտանիքով, ձեզ հետ ծառայելու ենք Հայաստանի Հանրապետությանը ու հայ ժողովրդին։ Ձեր ցավը տանեմ: Դուխով»,- գրել է արտասահմանում բնակվող հայերից մեկը:
Նշենք, որ փոխանցումները սկսվում են 1000 դրամից ու հասնում մինչև մի քանի հարյուր դոլարի: Հիմնադրամի տրամադրած պաշտոնական տեղեկատվության համաձայն` վերջին 3 օրվա ընթացքում (17․07․2020-20.07.2020) կատարվել է շուրջ 13 000 000 դրամի նվիրատվություն:
Հիշեցնենք, որ հուլիսի 12–ից իրավիճակը սրվել է հայ–ադրբեջանական սահմանի Տավուշի հատվածում։ Հուլիսի 12–ին` ժամը 12:30-ի սահմաններում, Ադրբեջանի զինված ուժերի զինծառայողները ՈւԱԶ մակնիշի ավտոմեքենայով Տավուշի ուղղությամբ ՀՀ պետական սահմանը խախտելու փորձեր են արել: Հայկական կողմի նախազգուշացումից հետո Ադրբեջանի զինծառայողները, թողնելով ավտոմեքենան, վերադարձել են իրենց դիրքեր:
Դրանից հետո հակառակորդը պարբերաբար վերսկսում է գնդակոծությունն ինչպես հայ դիրքապահների, այնպես էլ բնակավայրերի ուղղությամբ։
Հուլիսի 20-ի պաշտոնական տվյալներով՝ Ադրբեջանն ունի 13 զոհ, վիրավորների մասին որևէ բան չի հաղորդվում, իսկ հայկական կողմը 4 զոհ ունի, 36 վիրավոր (ևս մեկը խաղաղ բնակչությունից)։
