ԵՐԵՎԱՆ, 21 հուլիսի — Sputnik. ՀՀ վարչապետ Նիկոլ Փաշինյանը Facebook-ում գրառում է արել՝ ՀՀ քաղաքացիներին կոչ անելով համալրել նոր ստեղծվող պարեկային ծառայության շարքերը:
«Տեղյակ եք, որ Հայաստանի կառավարությունը ոստիկանության բարեփոխումների համատեքստում նախատեսում է ստեղծել պարեկային ծառայություն՝ նոր գործելաոճով, նոր հմտություններով, բարձր աշխատավարձով ու նոր տեխնիկական միջոցներով: Արդեն հայտարարվել է պարեկային ծառայությունում աշխատանքի անցնելու նպատակով ոստիկանության կրթահամալիրում ուսուցման միասնական ընդունելություն-մրցույթ։ Դիմեք և ձեր ներդրումն ունեցեք Հայաստանի համար կարևոր այս կառույցի ձևավորման ու կայացման գործում»,- գրել է վարչապետը:
Հիշեցնենք՝ հայտերի ընդունումը սկսվել է մեկ շաբաթ առաջ՝ հուլիսի 13-ին, և կավարտվի հուլիսի 30-ին։ Ուսուցման տևողությունը 5 ամիս է: Ընդունելություն-մրցույթի համար սահմանվում է 770 տեղ, որից 540 տեղը՝ արական, 230–ը՝ իգական սեռի դիմորդների համար:
Կառավարության որոշմամբ ստեղծվող նոր պարեկային ծառայությունն ունենալու է առանձին նոր լոգո, նոր համազգեստ, զենքի հատուկ միջոցների, տրանսպորտային միջոցների և տեխնիկական սարքավորումների լրիվ նոր հագեցվածություն։ Պարեկային ծառայության ծառայողների նվազագույն աշխատավարձը կկազմի 320 հազար դրամ, նրանք ունենալու են նաև սոցիալական երաշխիքներ։
Ծառայության կարող են անցնել 18-35 տարեկան քաղաքացիները:
Պարեկային ծառայության հիմնական գործառույթներն են հանդիսանալու հասարակական կարգի և հասարակական անվտանգության ապահովումը, ճանապարհային երթևեկության անվտանգության ապահովումը, քաղաքացիներին անհետաձգելի օգնության և հոգեբանական աջակցության ցուցաբերումը։
«Ոստիկանի լրիվ նոր կերպար». ինչ փոփոխություններ են իրականացվում ոստիկանությունում
Պարեկային ծառայությունը ոստիկանական համակարգի բարեփոխումների՝ Հայաստան-ԵՄ Համապարփակ և ընդլայնված գործընկերության համաձայնագրի պահանջներից է:
