22:22 01 հոկտեմբերի 2020
Ուղիղ եթեր
  • USD488.58
  • GBP627.73
  • EUR573.93
  • RUB6.32
Հայաստան
Ստանալ կարճ հղումը
236 0 0

ԿԳՄՍ-ն որոշել է ընդառաջել 18 և ավելի բարձր միավորով 6 դիմորդի և առաջարկել է իրենց դիմում-հայտերի հաջորդ կրթական ծրագրերին համապատասխան լուծումներ։

ԵՐԵՎԱՆ, 26 հուլիսի - Sputnik. Ավարտվել է բուհի ընդունելության լրացուցիչ փուլով թափուր տեղերի մրցույթը։ Facebook-ի իր էջում ուղիղ եթերի ժամանակ լուրը հայտնեց կրթության, գիտության, մշակույթի և սպորտի նախարար Արայիկ Հարությունյանը։

Նախարարը որոշել էր մի քանի տվյալ ներկայացնել այս տարվա արտակարգ դրության պայմաններում անցկացված բուհական ընդունելության արդյունքների վերաբերյալ։

Գնահատման և թեստավորման կենտրոնի տվյալներով՝ 2020թ. ընդունելության միասնական քննության համար հայտագրվել են 11 979 դիմորդ, մասնակցել են 11 648 դիմորդ, դրական միավոր ստացել են 9372 դիմորդ: Այս արդյունքներում ներառված չեն ռազմական և գերատեսչական բուհերի դիմորդները։ Դրական միավոր ստացած 8706 դիմորդ ընդունվել են հիմնական փուլով։

Թափուր տեղերի համար երեկ ավարտված մրցույթի արդյունքով` ընդունվել են 472 դիմորդ, չեն ընդունվել 49-ը:

«Արդյունքում ստացվում է, որ շուրջ 12 հազար դիմորդներից, որոնք մասնակցել են ընդունելության քննություններին, դրական գնահատական ստացած ու բուհերի միասնական քննության արդյունքում չընդունված դիմորդների թիվը 223 է, որոնք հնարավորություն ունեն սեպտեմբերին` հեռակա ընդունելության ժամանակ, պահպանելով իրենց գնահատականը, դիմել բուհեր»,- նշեց նախարարը՝ հավելելով, որ, ըստ էության, մշակվող այս համակարգով` քիչ է հավանականությունը, որ մյուսները կարող են չընդունվել բուհերի հեռակա բաժիններ։

Նախարարությունը լուծում է գտել նաև այն դիմորդների համար, որոնք 18 և ավելի բարձր գնահատական են ստացել և չեն ընդունվել բուհեր։

«Այս տարի միասնական քննությամբ գերազանց՝ 18 և ավելի բարձր գնահատական ստացած, բայց բուհ չընդունված 6 դիմորդի առաջարկվել է իրենց դիմում-հայտերի հաջորդ կրթական ծրագրերին համապատասխան լուծումներ։ Վեցից չորսն արձագանքել է»,- ասաց նախարարը՝ նշելով, որ նրանցից մեկն ասել է, որ հեռակայի համար է դիմելու, իսկ մյուս դիմորդն էլ նշել է, որ ինքը հենց իր ընտրած մասնագիտությամբ է ցանկանում սովորել, այդպես էլ լրացրել էր հայտը։

Նախարարը պնդում է՝ ընդունելության նոր կարգի վերաբերյալ պատշաճ իրազեկում արվել է նաև ԶԼՄ-ներով։

«Պատուհանը փակում էին, երդիկից էինք մտնում»,- ասաց նախարարն ու որպես ապացույց` իր ապրիլի 30-ի ուղիղ եթերից մի հատված կրկնեց, որում տեղեկացրել էր ընդունելության նոր կարգի մասին։

Դիմորդները կասեն՝ էս կորոնավիրուսը «լազաթ» տվեց. Փաշինյան

ԿԳՄՍ նախարարը նաև անդրադարձավ նոր չափորոշիչների շուրջ բարձրացված աղմուկին՝ տարածվող լուրերն անվանելով «կեղծ և սուտ»։ Նա խոստացավ այդ խնդրին անդրադառնալ վաղը՝ նշելով, որ պարզապես «ուզում է թողնել, որ մի քանի մասնագետներ իրենց կեղծիքով և ստով ավելի խայտառակվեն, որից հետո ինքը կետ առ կետ կանդրադառնա դրանց»։

Հիշեցնենք՝ այս տարի ընդունելության կարգում նորամուծություն էր կատարվել, որի մասին դիմորդների մի մասն իմացել էր միայն այն բանից, երբ պարզել էր՝ դրական միավոր է ստացել, բայց ոչ մի բուհ չի ընդունվել։ Հարցն այն է, որ այս տարի կարևորվել է մասնագիտությունը, և առաջնայնությունը տրվել է ոչ թե որևէ առարկայից բարձր ստացողներին, այլ տվյալ մասնագիտությունն առաջին հայտով նշածներին։

Հայաստանում այս տարի միասնական քննությունները մեկնարկեցին հուլիսի 2–ին և ավարտվեցին հուլիսի 8-ին։

Կորոնավիրուսային իրավիճակով պայմանավորված` դիմորդները միայն մեկ քննություն հանձնեցին բուհ ընդունվելու համար։

Ըստ թեմայի

Փաշինյանն ու նախարարը խնդրանքով դիմեցին դիմորդների ծնողներին
Կորոնավիրուսով վարակված դիմորդներին ևս մեկ հնարավորություն կտրվի
Արդարության սկզբունքը խախտվե՞լ է․ ով է ճիշտ`բողոքող դիմորդները, թե արդարացող ԿԳՄՍՆ–ն
Դրական միավոր ստացած, բայց դուրս մնացած դիմորդներին ԿԳՄՍ-ն հնարավորություն է տալիս
թեգերը:
Քննություն, բուհ, դիմորդ, Կրթության, գիտության, մշակույթի և սպորտի նախարարություն (ԿԳՄՍ), Արայիկ Հարությունյան

Գլխավոր թեմաներ