ԵՐԵՎԱՆ, 28 հուլիսի – Sputnik. Հյուսիս-հարավ ճանապարհի շինարարության ընթացքում թույլ տրված չարաշահումների գործով նախաքննության շրջանակներում կալանավորվել է «Սթոնս» ՍՊ ընկերության գլխավոր հաշվապահը:
Ինչպես հայտնում է ՀՀ քննչական կոմիտեն, այս ընկերությունը չինական «Սինոհիդրո Քորփորեյշն» ընկերության ենթակապալառուն է, որի կառավարմամբ զբաղվել են «Մուլտի գրուպ» կոնցեռնի տնօրեն Սեդրակ Առուստամյանը, Գուրգեն Սարգսյանն ու Սուրեն Ավագյանը, որին մեղադրանք էր առաջադրվել դեռ մեկ տարի առաջ` 2019թ. սեպտեմբերի 20-ին:
Նույն գործի շրջանակում մեղադրանքներ էին առաջադրվել նաև «Սթոնս» ՍՊ ընկերության գլխավոր հաշվապահին, ինչպես նաև նույն ընկերությանն իբր խորհրդատվական ծառայություններ մատուցած «ԷՄ ԷՍ Քոնսալթինգ» ՍՊԸ-ի և «Գևորգյան քոնսալթինգ» ՍՊԸ-ի տնօրեններին: Նրանց նկատմամբ որպես խափանման միջոց ընտրվել էր ստորագրություն չհեռանալու մասին:
Քրեական գործի հետագա նախաքննությամբ պարզվել է, որ Սեդրակ Առուստամյանը, Գուրգեն Սարգսյանի և Սուրեն Ավագյանի հետ փաստացի ղեկավարելով «Սթոնս» ՍՊԸ-ն, Հյուսիս-Հարավի Թալին-Գյումրի ճանապարհի Թալին-Լանջիկ և Լանջիկ-Գյումրի հատվածների շինարարական աշխատանքներն իրականացնող կապալառու «Սինոհիդրո Քորփորեյշն» ՍՊԸ-ի հայաստանյան մասնաճյուղի ներկայացուցիչների դրդմամբ, համաձայնություն է ձեռք բերել՝ այդ ընկերությանն առանց ծառայությունների մատուցման հարկային հաշիվներ դուրս գրելու և ֆինանսական միջոցներ տրամադրելու վերաբերյալ:
«Մուլտի գրուպի» տնօրենը խոշոր կաշառք է տվել Գագիկ Խաչատրյանին. նոր մանրամասներ
Արդյունքում Սեդրակ Առուստամյանը, Սուրեն Ավագյանն ու Գուրգեն Սարգսյանը ընկերության գլխավոր հաշվապահի միջոցով 2016թ. հոկտեմբերի 10-ին և նոյեմբերի 11-ին հիմնադրել են «ԷՄ ԷՍ Քոնսալթինգ» և «Գևորգյան Քոնսալթինգ» ՍՊ ընկերությունները, որոնց հետ «Սթոնս» ՍՊ ընկերությունը կնքել է իբրև թե խորհրդատվական ծառայություններ ձեռք բերելու պայմանագրեր և դրանց հիման վրա նրանց է փոխանցել 1 162 260 574 ՀՀ դրամ: Ընկերության գլխավոր հաշվապահն էլ իր ղեկավարների հանձնարարությամբ, այդ դրամական միջոցների հանցավոր ծագումը քողարկելու նպատակով դրանից 140.000.000 դրամը փոխանցել է «ԷՄ ԷՍ Քոնսալթինգ» ՍՊ ընկերությանը, իսկ 124.800.000 ՀՀ դրամը՝ «Գևորգյան Քոնսալթինգ» ՍՊ ընկերությանը՝ իբրև թե վերջիններիս կողմից մատուցվող ծառայությունների համար կանխավճար:
Նրանք էլ իրենց հերթին այդ գումարները «լվանալու» համար դրանք ձևակերպել են որպես այդ ընկերությունների կարիքների համար ծախսեր, կանխիկացրել, դրանցից որպես իրենց աշխատավարձ պահել են 12.000.000 դրամ և 8.000.000 դրամ, իսկ մնացած 108.100.000 և 118.800.000 դրամը՝ ընդհանուր 226.900.000, առձեռն փոխանցել են Սեդրակ Առուստամյանին:
Ընկերության գլխավոր հաշվապահը, գործելով «Սթոնս» ՍՊ ընկերության` վերը նշված ղեկավար անձանց հանձնարարություններով, «Սինոհիդրո Քորփորեյշն» ՍՊ ընկերության հայաստանյան մասնաճյուղի կողմից հանցավոր գործողությունների արդյունքում փոխանցած մնացած գումարների ծագման աղբյուրը և իրական բնույթը խեղաթյուրելու՝ դրանք օրինականացնելու և նրանց փոխանցելու համար, այդ գումարներից ևս 603.000.000 ՀՀ դրամը ձևակերպել է որպես դիվիդենտ-շահաբաժին և, այն կանխիկացնելով, ամբողջությամբ փոխանցել Սեդրակ Առուստամյանին:
«Սթոնս» ՍՊ ընկերության կողմից «Սինոհիդրո Քորփորեյշն» ՍՊ ընկերության հայաստանյան մասնաճյուղին ներկայացված 1.167.409.328,31 ՀՀ դրամի 7 կեղծ հարկային հաշիվների տվյալները «Սինոհիդրո Քորփորեյշն» ՍՊ ընկերության հայաստանյան մասնաճյուղի ներկայացուցիչների հանձնարարությամբ ընդունվել են և այդ տվյալները ներառվել ընկերության կողմից 2016-2017թթ. գործունեության հաշվետվությունում և ԱԱՀ-ի հաշվարկներում:
«Մուլտի գրուպի» տնօրենը ձերբակալվել է ու հարցաքննվել
Դրա արդյունքում «Սինոհիդրո Քորփորեյշն» ՍՊ ընկերության հայաստանյան մասնաճյուղը խուսափել է առանձնապես խոշոր չափերի՝ 240.321.559 ՀՀ դրամի չափով հարկեր վճարելուց՝ պետությանը պատճառելով առանձնապես խոշոր չափի վնաս:
Այսպիսով, Սթոնս» ՍՊԸ-ի կողմից վերոհիշյալ կեղծ գործարքների համար ստեղծված «Գևորգյան Քոնսալթինգ» և «ԷՄ ԷՍ Քոնսալթինգ» ՍՊԸ-երի կողմից՝ առանց ծառայությունների մատուցման դրանց վերաբերյալ կեղծ փաստաթղթեր դուրս գրելու համար հաշվարկված տույժ-տուգանքները ընդհանուր, կազմում են 2.729.457.229 ՀՀ դրամ:
Բացի այդ «Սթոուն» ՍՊԸ գլխավոր հաշվապահը 2018թ. ապրիլի 1-ին «Գոլդեն Ֆլոուր» ՍՊ ընկերության տնօրենի հետ կնքված պայմանագրի շրջանակներում հաշվապահական ծառայություններ մատուցելով` տնօրենին խոստացել է ստուգումների դեպքում կաշառել ստուգողներին և 2020թ. մարտի 2-ին, տեղեկանալով ստուգողների հայտնաբերած խախտումների մասին, նպաստել է կաշառք տալու և ստանալու շուրջ համաձայնության ձեռք բերմանը:
2020թ. մարտի 23-ին գլխավոր հաշվապահին մեղադրանք է առաջադրվել ՀՀ քրեական օրենսգրքի 38-311-րդ հոդվածի 4-րդ մասի 2-րդ կետով և միջնորդություն է ներկայացվել դատարան՝ վերջինիս նկատմամբ կալանավորումը որպես խափանման միջոց կիրառելու մասին, որը բավարարվել է, սակայն դատարանի կողմից որպես կալանքի այլընտրանքային խափանման միջոց է կիրառվել գրավը:
Նախաքննության հետագա ընթացքում պարզվել է նաև, որ հաշվապահը նաև կատարված հանցանքի հետքերը թաքցնելու, մեղադրվող անձանց պատասխանատվությունից ազատող հիմքեր ստեղծելու նպատակով, կեղծ տվյալներ է ներառել արդեն իսկ կազմված, լրացված և հարկային ծառայության, կողմից վավերացված «Սթոնս» ՍՊ ընկերության դրամարկղային գիրքը:
Պոլիգրաֆիական արտադրանքի տպագրությամբ զբաղվող Ա/Ձ աշխատակցուհու հետ ձեռք բերված նախնական համաձայնությամբ, «Սթոնս» ՍՊ ընկերության դրամարկղային գիրքը 2020թ. փետրվարի 1-ին տրամադրել է վերջինիս, ով դրանում լրացված թերթերը փոխարինել է նորերով: Հաշվապահն էլ դրանում կեղծ տվյալներ է ներառել:
Ձեռք բերված նոր ապացույցների համակցությամբ՝ 2020թ. հուլիսի 21-ին որոշում է կայացվել գլխավոր հաշվապահին առաջադրված մեղադրանքները փոփոխել, լրացնել ՀՀ քրեական օրենսգրքի 189-րդ հոդվածի 1-ին և 3-րդ մասերով, 190-րդ հոդվածի 3-րդ մասի 1-ին կետով, 38-205-րդ հոդվածի 2-րդ մասով, 313-րդ հոդվածի 1-ին մասով և 325-րդ հոդվածի 2-րդ մասով: Հուլիսի 24-ին դատարանի որոշմամբ հաշվապահի խափանման միջոցը փոխարինվել է կալանքով:
Նախաքննությունը շարունակվում է:
