03:17 25 հոկտեմբերի 2020
Ուղիղ եթեր
  • USD494.01
  • GBP646.41
  • EUR585.25
  • RUB6.47
Հայաստան
Ստանալ կարճ հղումը
82 0 0

Ջերմուկի քաղաքապետի խոսքով` երկու կողմերի հետ էլ պայմանավորվածություն են ձեռք բերել։

ԵՐԵՎԱՆ, 6 օգոստոսի - Sputnik. Ջերմուկի քաղաքապետ Վարդան Հովհաննիսյանը լրագրողների հետ զրույցում հայտնեց, որ վաղն ամենայն հավանականությամբ «Լիդիան» ընկերության և Ամուլսարի պահապանների վագոն-տնակները կհանվեն։ Նրա խոսքով` խնդրի լուծումները քննարկվում են, կառավարություն տեղյակ է։

«Այստեղ տեղադրված վագոն-տնակի հարցի ուղղությամբ մենք նամակ ենք գրել «Լիդիանին»։ Պայմանավորվել ենք երկու կողմերի հետ, որ վագոն-տնակները տեղափոխեն, ճանապարհ չպետք է փակվի»,- ասաց Հովհաննիսյանը։

Քաղաքապետը նշեց, որ Ամուլսարի 3 հենակետերում էլ այդ հարցը բարձրացվել է, այս պահին սպասում են «Լիդիան» ընկերության պատասխանին։

Հավելենք`արդեն երրորդ օրն է, որ Ամուլսարում բողոքի ակցիան չի դադարում։ Ցուցարարները պահանջում են, որ «Լիդիան Արմենիա» ընկերության վարձած նոր պահնորդական ծառայության վագոն-տնակները 30 մետր հեռացվեն տարածքից, ընկերության պահնորդական խումբը դուրս հանվի Ամուլսարի տարածքից և կառավարությունը հստակ որոշում կայացնի Ամուլսարի խնդրի վերաբերյալ։

Ամուլսարի խնդրով բերման ենթարկված քաղաքացիներն անվճար իրավաբանական օգնություն կստանան

Հիշեցնենք՝ օգոստոսի 3-ին «Լիդիան Արմենիա» ընկերությունը հանել էր դեպի Ամուլսարի հանքավայր տանող ուղու վրա տեղադրված «Ամուլսարի պահապանների» վագոն–տնակները ու դրանց փոխարեն պահնորդների համար նախատեսված վագոն-տնակներ տեղադրել, ինչն առաջ էր բերել բողոքի ակցիայի մասնակիցների դժգոհությունը:

Վերջինները հայտարարություն էին տարածել` պահանջելով վերադարձնել իրենց տնակները նախկին տեղը և քաղաքացիներին կոչ անելով ընտանիքներով, երեխաների հետ գնալ Ջերմուկ ու միանալ բողոքի ակցիաներին:

«Լիդիան Արմենիա» ընկերությունն իր հերթին հայտարարել էր, որ սեփական տարածքից հեռացրել է ապօրինի գույքը։

Հիշեցնենք, որ Ջերմուկի բնակիչները դեռևս նախորդ տարվանից պարբերաբար փակում են Ամուլսար տանող ճանապարհները: Նրանք կարծում են, որ հանքի շահագործումը մեծ վնաս կհասցնի շրջակա միջավայրին: 2018 թվականի հունիսից մի խումբ մարդիկ` «Ամուլսարի պահապանները», գիշեր-ցերեկ հերթապահում են՝ փակ պահելով դեպի հանք տանող ճանապարհները։

ՀՀ վարչապետ Նիկոլ Փաշինյանը 2018 թ–ի սեպտեմբերի 9–ին Facebook–յան ուղիղ եթերում անդրադարձել էր Ամուլսարի հանքի շահագործման թեմային` ասելով, որ Ջերմուկի բնակիչները պետք է ապաշրջափակեն Ամուլսարի հանք տանող ճանապարհները:

2019 թ. ապրիլին ՀՀ վարչական դատարանը պարտավորեցրել է ոստիկանությանը վերացնել ներխուժումը և հեռացնել անձանց ու նրանց գույքը ընկերությանը պատկանող տարածքից։

Ավելի վաղ լիբանանյան «Էլարդ» ընկերությունն Ամուլսարի հանքի շահագործման ընթացքում իրականացրել էր շրջակա միջավայրի ռիսկերի գնահատում: Ընկերության ներկայացուցիչները ուսումնասիրել էին դեռևս 2016 թ.-ին «Լիդիան Արմենիա» ընկերության պատրաստած` շրջակա միջավայրի վրա ազդեցության գնահատումը և հայտարարել հնարավոր ռիսկերի մասին: Միևնույն ժամանակ Հայաստանի քննչական կոմիտեի ներկայացուցիչները նշել են, որ ռիսկերը կառավարելի են:

Ամուլսարի ոսկու հանքը Հայաստանի երկրորդ խոշոր հանքավայրն է: Այն ղեկավարում է «Լիդիան Արմենիա» ՓԲԸ-ն, որը միջազգային «Lydian international» ընկերության դուստր ձեռնարկությունն է:

Ըստ թեմայի

Նոր աղմուկ Ամուլսարի շուրջ, կամ ինչու են Ջերմուկի բնակիչները կրկին փողոց դուրս եկել
Աշխատանք ենք ուզում. «Լիդիան Արմենիայի» նախկին աշխատողները կարդացին Փաշինյանին գրած նամակը
թեգերը:
Ջերմուկ, Ամուլսար, Հայաստան

Գլխավոր թեմաներ