ԵՐԵՎԱՆ, 11 օգոստոսի – Sputnik. «Բարգավաճ Հայաստան» կուսակցության ղեկավար Գագիկ Ծառուկյանի պաշտպանները վերաքննիչ դատարանի որոշումը բողոքարկել են վճռաբեկ դատարանում։ Sputnik Արմենիայի հետ զրույցում տեղեկությունը հայտնեց Ծառուկյանի պաշտպան Սմբատ Մինասյանը։
«Երեկ երեկոյան բողոք ներկայացրինք, քանի որ այսօր վերաքննիչի կայացրած որոշման բողոքարկման վերջին օրն էր։ Վերաքննիչի որոշման մեջ կան կետեր, որոնք մեր սրտով չեն։ Խոսքը վերաբերում է անձեռնմխելիության հաղթահարմանը, քաղաքական հետապնդմանը, քրգործ հարուցելու և հիմնավոր կասկածի օրինականությանը»,–ասաց Մինասյանը։
Նա հիշեցրեց, որ վերաքննիչ դատարանը որոշել էր բեկանել Երևանի ընդհանուր իրավասության դատարանի որոշումը (Երևանի ընդհանուր իրավասության դատարանը մերժել էր Ծառուկյանի նկատմամբ կալանքը որպես խափանման միջոց ընտրելու՝ ԱԱԾ-ի միջնորդությունը)` այն առաջին ատյանի դատարան նոր քննության ուղարկելով։ Մինասյանը հայտնեց` վերաքննիչը որոշել է նոր քննության ուղարկել գործը, քանի որ ըստ հիմնավորման` առաջին ատյանի դատարանը լավ չի հետազոտել փաստաթղթերը։
Երկու ամսվա ընթացքում վճռաբեկ դատարանը պետք է որոշում կայացնի` վարույթ ընդունո՞ւմ է Ծառուկյանի պաշտպանների բողոքը, թե՞ ոչ։
Հիշեցնենք` ԱԱԾ-ն հունիսի 14-ին խուզարկություն իրականացրեց Գագիկ Ծառուկյանի առանձնատանը: Ավելի ուշ հայտնի դարձավ, որ նրա դեմ 3 քրեական գործ է հարուցվել ապօրինի ձեռնարկատիրական գործունեության, ընտրակաշառք բաժանելու և հողատարածքների օտարման փաստերով։
Հունիսի 30-ին պարզվեց, որ Ծառուկյանը կորոնավիրուսով է վարակվել։ Վերջին դատական նիստերին նա չէր գալիս։
Ծառուկյանն արգելված գործունեությամբ է զբաղվել. Կոռուպցիայի կանխարգելման հանձնաժողով
