ԵՐԵՎԱՆ, 12 օգոստոսի– Sputnik. Այսօր կառավարության առջև բողոքի ակցիա էին անում Ռուսաստան մեկնել ցանկացող հայերը, որոնք կորոնավիրուսի հետևանքով արդեն մի քանի ամիս է` չեն կարողանում մեկնել ՌԴ։ Նրանց մոտեցավ ՀՀ արտաքին գործերի նախարար Զոհրաբ Մնացականյանը;
«Մարտի 12-ից 1 շաբաթով եկել եմ Հայաստան և մնացել այստեղ։ 4 տարեկան երեխաս քանի ամիս է` ինձ է սպասում։ Նա արդեն հիվանդացել է` ես իրավունք չունե՞մ նրա մոտ լինելու։ Ուզում եմ ճիշտ հասկանաք` մենք հայրենասեր ենք, բայց մեր գործը, ընտանիքն այնտեղ է։ Ես ՌԴ–ում ունեի աշխատանքային պայմանագիր, որի ժամկետը մայիսին լրացել է` ի՞նչ ենք անելու հետո»,–Մնացականյանին դիմելով ասաց մի կին` ավելացնելով, որ ինքը ՌԴ քաղաքացիություն չունի։
Ի պատասխան Զոհրաբ Մնացականյանը նշեց, թե ոչ ոք կասկածի տակ չի դնում Ռուսաստան կամ որևէ այլ երկիր մեկնել ցանկացող հայերի հայրենասիրությունը։ Նախարարը հիշեցրեց, որ կորոնավիրուսի հետևանքով յուրաքանչյուր երկիր իր որոշումն է կայացրել թռիչքների առնչությամբ։
«Ճգնաժամային իրավիճակում ենք։ Յուրաքանչյուր երկիր ինքն է որոշում` ում է իր երկիր թողնում, ում չի թույլատրում։ Մենք չենք կարող ասել` բաց թողեք մեր քաղաքացիներին ձեր երկիր, իրենք իրենց կանոններն ունեն»,–ասաց նախարարը։
Մնացականյանը հետաքրքրվեց, թե արդյո՞ք ՌԴ մեկնել ցանկացողները փորձել են իրենց կյանքը դասավորել Հայաստանում, սակայն վերջիններս ասացին, որ ՌԴ–ում արդեն վաղուց են հաստատվել և այնտեղ ունեն տուն–տեղ, աշխատանք։
Բողոքի ակցիա անողներն առաջարկեցին, որ տեղափոխումը գոնե ցամաքային ճանապարհով կազմակերպեն և իրենք Ռուսաստան հասնեն ավտոբուսներով։
Ավելի ուշ բողոքի ակցիա անողներին մոտեցավ «Իմ քայլը» խմբակցության պատգամավոր Հայկ Սարգսյանը։ Նա նշեց, որ այսօր կառավարության որոշմամբ հանվել է ոչ ՀՀ քաղաքացիների` Հայաստան մուտք գործելու արգելքը։ Իսկ ինչ վերաբերում է ՀՀ քաղաքացիների` այլ երկիր մուտք գործելուն, ապա դա ոչ թե Հայաստանի, այլ մյուս երկրների կանոններին համապատասխան է արվում։
Նա խոստացավ տեղեկություններ ճշտել Ռուսաստան մեկնել ցանկացողների համար և փոխանցել նրանց։
Նշենք, որ բողոքի ակցիան դեռ շարունակվում է։
Հիշեցնենք, որ կորոնավիրուսի հետևանքով մի շարք երկրներ տեղաշարժի սահմանափակումներ են մտցրել։ Ռուսաստան, օրինակ, կարող են մուտք գործել միայն ՌԴ քաղաքացիները։ ՀՀ կառավարությունն այսօր որոշեց, որ այլ երկրի քաղաքացիները կարող են այսուհետ մուտք գործել Հայաստան։
Ռուսաստանը պարզեցրել է օտարերկրացի ուսանողներին աշխատանքի վերցնելու գործընթացը
