ԵՐԵՎԱՆ, 19 օգոստոսի – Sputnik. 2016-ի ապրիլի 5-ին Մոսկվայում կայացած հանդիպման ժամանակ Հայաստանը հասավ նվազագույնին` նոր համաձայնագիր չստորագրվեց, և 1994-ին ստորագրված համաձայնագիրը մնաց ուժի մեջ։ ՀՀ երկրորդ նախագահ Սերժ Սարգսյանն այս մասին ասաց այսօր հրավիրված մամուլի ասուլիսի ժամանակ` ի պատասխան այն հարցին, թե ո՞րն էր Մոսկվայի դերակատարությունն այդ բանակցությունների ժամանակ։
«Ապրիլի 5-ին Մոսկվայում տեղի ունեցավ հանդիպում, որին մասնակցում էր ՀՀ ԶՈՒ ԳՇ նախկին պետ Յուրի Խաչատուրովը։ Մինչ այդ հանդիպումը մենք պայմանավորվել էինք, թե որը պետք է լիներ մեր առավելագույն և նվազագույն խնդիրը։ Մոսկվայում որևէ համաձայնագիր չստորագրվեց` ո՛չ գաղտնի, ո՛չ բաց»,–ասաց Սարգսյանը։
Նրա խոսքով` բոլորի համար էլ հասկանալի էր, որ Հայաստանի համար առավելագույն խնդիրը պետք է լիներ Ադրբեջանից պահանջել դիրքերի նախնական դասավորությունը։ Սակայն Ադրբեջանը, ըստ Սարգսյանի, չհամաձայնեց` այն փաստարկմամբ, որ այդքան կորուստներից հետո որևէ կերպ չեն կարող արդարացնել դիրքերի վերադարձը։
Սարգսյանին ուղղվեց ևս մեկ հարց, թե ի՞նչ սցենարներ են քննարկվել մոսկովյան հանդիպման ժամանակ։ Սարգսյանը հիշեցրեց` մինչ այդ հանդիպումն արդեն հայտարարվել էր հրադադարի ռեժիմ։
Նա պատմեց, որ Մոսկվայում կայացած հանդիպումից առաջ իրեն զանգահարել էր Խաչատուրովը և պատմել, որ ՌԴ ԳՇ պետն է զանգահարել իրեն` ասելով, որ Ադրբեջանը պատրաստ է հանդիպել և հրադադարի թեմայով խոսել։ Խաչատուրովը ՌԴ ԳՇ պետին ասել է, որ պատրաստ է հանդիպման գնալ, բայց Թիֆլիսում, քանի որ այն շատ մոտ է, և եթե ռազմական գործողություններ սկսվեին, արագ կվերադառնար Հայաստան։ Սակայն ադրբեջանական կողմը չի համաձայնել Թիֆլիսում հանդիպել, քանի որ, ըստ Սարգսյանի, ցանկացած պայմանավորվածություն միջնորդի կարիք ունի։ Դրանից հետո էլ Մոսկվայում կայացել է հայտնի հանդիպումը։
Իսկ ինչ վերաբերում է Յուրի Խաչատուրովին, ապա նա, Սարգսյանի կարծիքով, շատ լավ է ղեկավարել ռազմական գործողությունները, և գոհ է նրա, ինչպես նաև ԳՇ–ի կողմից արված աշխատանքից ապրիլյան քառօրյայի օրերին։ Սերժ Սարգսյանը նշեց` Խաչատուրովը չի գնացել Ապրիլյան քննիչ հանձնաժողով և խոսել այդ ամենի մասին, քանի որ նա ուղնուծուծով զինվորական է, և նրա համար շատ վիրավորական են մինչ այդ հնչած հայտարարությունները։
«Խաչատուրովը նվիրված է բանակին, բայց հայտարարություններ էին տարածվում, թե ռազմական գործողությունները սկսելու ժամանակ նա բիլիարդ էր խաղում»,–ասաց Սարգսյանը։
Նա կարծում է` կգա ժամանակ, և Խաչատուրովն էլ կխոսի այդ ամենի մասին։
