ԵՐԵՎԱՆ, 20 օգոստոսի – Sputnik. «Ասիական զարգացման բանկը» կորոնավիրուսի դեմ պայքարի համար 2 միլիոն դոլար դրամաշնորհ կտրամադրի Հայաստանին։ Կառավարությունն այսօր հաստատեց ՀՀ և «Ասիական զարգացման բանկի» միջև «COVID-19-ին արձագանքման ծրագիր» դրամաշնորհային համաձայնագրի ստորագրման առաջարկությանը հավանություն տալու մասին նախագիծը։
«Դրամաշնորհային համաձայնագրով նախատեսվող միջոցներն առողջապահության նախարարությունը կուղղի կորոնավիրուսային վարակի շրջանակում համապատասխան բժշկական պարագաներ և սարքեր ձեռք բերելուն»,– ասաց ՀՀ առողջապահության նախարար Արսեն Թորոսյանը։
Նրա խոսքով` գումարը կօգտագործվի կորոնավիրուսային հիվանդության համաճարակի հետևանքով տուժած առաջնային գծի բուժաշխատողների և բնակչության համար։ Մասնավորապես, ձեռք կբերվեն պաշտպանիչ անձնական սարքավորումներ, թեստավորման կոմպլեկտներ, ընդհանուր բժշկական պարագաներ և այլ անհրաժեշտ միջոցներ։
Նախարարը հայտնեց, որ սա «Ասիական զարգացման բանկի» առաջին օգնությունը չէ, և մինչ օրս ստացել ենք շարժական թվային ռենտգենի երկու սարք, արյան անալիզատորներ և այլն։
Հիշեցնենք` առողջապահության նախարարությունն ավելի վաղ հայտնել էր, որ ՀՀ-ում կորոնավիրուսի համավարակի (COVID-19) կանխարգելման, վերահսկման, բուժման և այլ համալիր միջոցառումների շրջանակներում 2020 թվականի մարտից մինչև հուլիսի 1-ն ընկած ժամանակահատվածում շուրջ 5.8 մլրդ դրամ գումար է ծախսել:
Հայաստանում կորոնավիրուսով վարակվածների թիվը հասել է 42319–ի։
Սկսել են գնահատել միտքը․ ինչպես է կորոնավիրուսն ազդել գովազդի շուկայի վրա
