ԵՐԵՎԱՆ, 31 օգոստոսի - Sputnik. ՀՀ արդարադատության նախարար Ռուստամ Բադասյանի կարծիքով՝ այն, որ քրեական ենթամշակույթի դեմ պայքարում գրանցվում են հաջողություններ, ակնհայտ: Բադասյանը նման կարծիք հայտնեց լրագրողների հետ զրույցում`անդրադառնալով վերջին օրերին տեղի ունեցող «խոշոր» ձերբակալություններին։
Օրերս հայտնի դարձավ, որ ձերբակալել և կալանավորել են մի շարք օրենքով գողերի՝ Անդրանիկ Սողոյանին («Զապին»), Գևորգ Մելիքյանին («Օշականցի Գևորիկին») և ուրիշներ։
«Հարուցված վերջին քրեական գործերին բոլորդ ծանոթ եք, բոլորդ տեսնում եք դրանցում Քրեակատարողական ծառայության ներդրումը։ Բնականաբար, որոշ դեպքերում այդ գործերի շրջանակում ՔԿՀ-ների խցերում կատարված խուզարկությունները կարող են որոշակի դիմադրության արժանանալ»,–ասաց Բադասյանը:
Թուրքիայի հանգստավայրերից մեկում սպանել են հայտնի «օրենքով գող» Լոտու Գուլիին
Նրա խոսքով` այդ դիմադրությունը հաղթահարելու օրենքով սահմանված մեխանիզմ կա, և իբրև թե խոշտանգումների միջոցով դրանց հասնելու վերաբերյալ լուրերն անհիմն են։
Նախարարն ընդգծեց, որ տարիներ շարունակ ՔԿՀ-ներում տեղի ունեցող խոշտանգման դեպքերը կապված են եղել քրեական ենթամշակույթի ազդեցության հետ: Նախարարությունն այժմ զբաղված է այդ հետևանքը ծնող պատճառների վերացմամբ։
«Օշականցի Գևորիկը» կալանավորվել է. ԱԱԾ–ն մանրամասներ է հայտնում
Բադասյանը վստահեցրեց` քրեական ենթամշակույթի դեմ պայքարն ընթանում է և կրում է շարունակական բնույթ:
Նա նշեց նաև, որ քրեական ենթամշակույթի օրենքի քննարկումների ժամանակ հնչած կարծիքները, թե օրենքը հաստատ չի գործածվելու, ջախջախված են։
Հիշեցնենք, որ ՀՀ նախագահը փետրվարի 18-ին ստորագրել էր ՀՀ քրեական օրենսգրքում փոփոխություններ և լրացումներ կատարելու մասին և ՀՀ քրեական դատավարության օրենսգրքում լրացում կատարելու մասին օրենքների փաթեթը:
ՀՀ վարչապետ Նիկոլ Փաշինյանն էլ հանրությանն առավել մատչելի կերպով ներկայացնելու համար հստակեցրել էր, որ օրենքը «օրենքով գողերի», «սխոդկաների», «օբշչյակների» և այս կարգի այլ երևույթների մասին է, որպեսզի այս ամենի մեջ ներգրավված մարդիկ ենթարկվեն պատասխանատվության։ Վարչապետի բնորոշմամբ` այս ենթամշակույթը կրող մարդիկ բանտը համարում են իրենց տունը, և հետևաբար, նրանց բոլորին պետք է ուղարկել իրենց տանն ապրելու։
«Oրենքով գողերի» դեմ 2 գործողություն` մեկ օրում. «Զապը» կալանավորվել է