ԵՐԵՎԱՆ, 7 սեպտեմբերի — Sputnik. «ՁԻԱՀ-ի կանխարգելման հանրապետական կենտրոն» ՊՈԱԿ-ի նախկին տնօրեն Սամվել Գրիգորյանը դատի է տվել ՀՀ առողջապահության նախարարությանն ու իր նախկին աշխատավայրին։ Այս մասին տեղեկանում ենք դատական տեղեկատվական datalex համակարգից։
Գրիգորյանը պահանջում է իրեն աշխատանքից ազատելու հրամանն անվավեր ճանաչել, վերականգնել իրեն պաշտոնում և բռնագանձել հարկադիր պարապուրդի գումարը։
Գործը մակագրվել է Երևանի ընդհանուր իրավասության դատարանի դատավոր Զարուհի Նախշքարյանին։ Դատարանը հայցադիմումը վարույթ է ընդունել է վարույթ:
Դատական նիստը տեղի կունենա հոկտեմբերի 29-ին։
Նշենք, որ փետրվար 26–ին ՀՀ առողջապահության նախարարությունը տեղեկացրել էր, որ նախարարի հրամանով լուծարվել է Սամվել Գրիգորյանի աշխատանքային պայմանագիրը` աշխատանքային պարտականությունները ոչ պատշաճ իրականացնելու հիմքով:
ՁԻԱՀ–ի կենտրոնի տնօրենն ազատվել է, փոխտնօրենը` տարվել ոստիկանություն. նախարարն ասաց` ինչու
Ավելի վաղ` այս տարվա հունվարի 30-ին, կառավարությունը որոշել էր միավորել ՁԻԱՀ-ի կանխարգելման հանրապետական կենտրոնն ու «Նորք» ինֆեկցիոն հիվանդանոցը։ Առողջապահության նախարար Արսեն Թորոսյանը պարզաբանել էր, որ Գրիգորյանին աշխատանքից ազատելը պայմանավորված է եղել այն հանգամանքով, որ Գրիգորյանը բազմիցս հրաժարվել է կատարել իր պահանջները։ Մասնավորապես, հրաժարվել է տրամադրել երկու բուժհիմնարկները միավորելու համար անհրաժեշտ փաստաթղթերը։
Դրանից հետո «ՁԻԱՀ-ի կանխարգելման հանրապետական կենտրոն» ՊՈԱԿ-ի մի քանի տասնյակ աշխատակիցներ ինքնակամ աշխատանքից ազատվելու դիմում ներկայացրին, բողոքի ակցիաներ եղան երկու կենտրոնների միավորման դեմ։
«Նորք» ինֆեկցիոն կլինիկական հիվանդանոցի և ՁԻԱՀ կանխարգելման հանրապետական կենտրոնը տնօրենի նորանշանակ ժամանակավոր պաշտոնակատար ունի. Հովհաննես Մադոյանն օրերս նշանակվեց այդ պաշտոնում։
ՁԻԱՀ–ի կենտրոնը նոր ղեկավար ունի. կոլեկտիվը նրան չի ընդունում
