ԵՐԵՎԱՆ, 21 սեպտեմբերի – Sputnik. ՀՀ նախագահ Արմեն Սարգսյանը կարծում է, որ անկախության 29 տարիների ընթացքում Հայաստանը սերտել է բոլոր լավ ու վատ դասերը։ Անկախության տոնի առթիվ Եռաբլուր այցելած նախագահը նման կարծիք հայտնեց լրագրողների հետ զրույցում։
«Ի սրտե շնորհավորում եմ բոլորիս տոնի կապակցությամբ։ 29 տարի առաջ մեր ողջ ժողովրդի երազանքն էր վերականգնել անկախ պետականությունը։ Այս 29 տարվա մեջ ունեցանք մեծ հաղթանակներ, դժվարություններ, ինչ–որ տեղ պարտվեցինք։ Կարծեմ` բոլոր լավ և վատ դասերը սովորել ենք։ Ժամանակն է նորից երազել, որպեսզի ապագա 30 տարում կառուցենք իրական, ամուր և հզոր պետություն»,–ասաց նախագահը։
Հարցին, թե իսկապե՞ս անկախ ենք, քանի որ ասում են` Հայաստանը կարևոր որոշումների հարցում գերտերությունների կարծիքը պետք է անպայման հաշվի առնի, նախագահը պատասխանեց` պետք է հավատալ սեփական ուժերին։
Նրա խոսքով` եթե որևէ մեկին թվում էր, որ 29 տարի առաջ բոլորը սպասում էին, որ Հայաստանն անկախ լինի, ապա այդպես չէ. Հայաստանն անկախացավ, քանի որ հայ ժողովուրդը միավորվեց ու իր կամքն իրականություն դարձրեց։
ՀՀ նախագահն ընդգծեց` պետք է հավատալ սեփական ուժերին, քանի որ աշխարհում չկա որևէ մեկը, որն իրեն կամ մեկ ուրիշի ստիպի ինչ–որ քայլ անել։ Ավելին, եթե կարգապահ լինենք և հստակ ծրագիր ունենանք, կհասնենք այդ ծրագրի իրագործմանը։
Հիշեցնենք` Հայաստանում այսօր տոն է, հայերը նշում են երկրի անկախության 29-ամյակը։ Եռաբլուրում են ինչպես վարչապետ Նիկոլ Փաշինյանը, այնպես էլ պաշտպանության նախարար Դավիթ Տոնոյանը, արտաքին գործերի նախարար Զոհրաբ Մնացականյանը և այլ պաշտոնյաներ։
1990 թվականի օգոստոսի 23-ին Հայաստանի նորընտիր Գերագույն խորհուրդն իր առաջին նստաշրջանում ընդունեց «Հայաստանի անկախության մասին» հռչակագիրը: Մեկ օր անց` օգոստոսի 24-ին, ՀԽՍՀ Գերագույն խորհուրդը որոշեց Հայկական Խորհրդային Սոցիալիստական Հանրապետությունը վերանվանել Հայաստանի Հանրապետություն:
Մեկ տարի անց` 1991թ-ի սեպտեմբերի 21-ին, անցկացված անկախության հանրաքվեի արդյունքում ընտրողների 99.5%-ն «այո» ասաց «Համաձա՞յն եք, որ Հայաստանի Հանրապետությունը լինի ժողովրդավարական անկախ պետություն` ԽՍՀՄ կազմից դուրս» հարցին։ Սեպտեմբերի 23-ին Գերագույն Խորհուրդը Հայաստանը հռչակեց անկախ, ինքնիշխան հանրապետություն:
