ԵՐԵՎԱՆ, 24 սեպտեմբերի — Sputnik. Հայաստանը ՌԴ–ում ընկալվում է որպես դաշնակից երկիր։ Այս մասին այսօր ՀՀ կառավարության նիստում ասաց ՀՀ վարչապետ Նիկոլ Փաշինյանը։
«Երեկ իմացա, որ 2020թ.–ին Ռուսաստանում լույս է տեսել «Ռուսաստանի դաշնակիցները» աշխատություն, որտեղ Հայաստանին տրվել է շատ բարձր գնահատական»,– ասաց վարչապետը։
ԱԽ քարտուղար Արթուր Գրիգորյանն էլ հայտնեց, որ աշխատությունն իրականացրել է ռուսական «ՑԱՍՏ» ռազմավարական հետազոտությունների վերլուծական կենտրոնը։
««Ռուսաստանի դաշնակիցները» աշխատության մեջ մանրամասն վերլուծված են ՀԱՊԿ անդամ երկրների դաշնակցային հարաբերությունները ՌԴ-ի հետ։ Եվ Հայաստանին տրված է շատ բարձր մակարդակ` ՌԴ–ի հետ հարաբերությունների կոնտեքստում»,–ասաց Գրիգորյանը։
Միջազգային կառույցները Հայաստանին գումար կտան կորոնավիրուսի հետևանքները չեզոքացնելու համար
Միաժամանակ Փաշինյանը հայտնեց, որ առաջիկայում ԱՄՆ–ի հետ նախատեսվում է ռազմավարական երկխոսության երկրորդ փուլը։
«Մենք մեր գործընկերների հետ գուցե ոչ սովորական, բայց շատ արդյունավետ հարաբերություններ ենք զարգացնում ու շարունակելու ենք զարգացնել»,– ասաց Փաշինյանը։
Ի դեպ` մինչ այդ, կառավարության այսօրվա նիստում ԵՄ–ի հետ ֆինանսական աջակցության համաձայնագրի քննարկման ընթացքում, Փաշինյանը նաև հայտարարեց, որ ժողովրդավարական բարեփոխումների հարցում Հայաստանի հիմնական գործընկերը Եվրամիությունն է։
«Եվրամիությունը, Ռուսաստանը, ԱՄՆ–ն մեզ համար շատ կարևոր գործընկերներ են, և մենք բնականորեն զարգացնում ենք մեր հարաբերությունները մեր գործընկերների հետ»,– ասաց Փաշինյանը։
ՀՀ վարչապետը նաև հավելեց, որ Հայաստանն ինտենսիվ հարաբերություններ ունի նաև իր հարևան երկրների` Իրանի և Վրաստանի հետ։
Հայաստանն 9 մլն եվրո է ստանալու դատավորների բարեվարքությունն ու ունեցվածքը ստուգելու համար
