ԵՐԵՎԱՆ, 10 հոկտեմբերի – Sputnik. ՀՀ պաշտպանության նախարարության ներկայացուցիչ Արծրուն Հովհաննիսյանը հայտնում է, որ րոպեներ առաջ հրթիռային հարված են հասցրել Կապան քաղաքին։
«Կան զոհեր և վիրավորներ»,– Facebook–ի իր էջում գրել է նա։
Ավելի վաղ ՀՀ ՊՆ–ն հայտնել էր, որ Ադրբեջանի ԶՈւ–ն անցել է օդային հարձակման` մեծ քանակությամբ և լայնորեն կիրառելով ԱԹՍ-ներ։
Այսօր առավոտյան Ադրբեջանն ԱԹՍ–ով հարված էր հասցրել Արցախի Քաշաթաղի շրջանի Երիցվանք գյուղական համայնքին և Կապանի շրջանի Արծվանիկ բնակավայրին։ Բացի այդ հերթական անգամ այսօր առավոտյան հրթիռակոծվել էր Արցախի Հանրապետության մայրաքաղաք Ստեփանակերտը։
Հիշեցնենք` Հայաստանի և Ադրբեջանի արտգործնախարարներ Զոհրաբ Մնացականյանն ու Ջեյհուն Բայրամովը երեկ Մոսկվա էին մեկնել` խորհրդատվություններ անցկացնելու։ ՌԴ արտգործնախարար Սերգեյ Լավրովի հետ համատեղ հանդիպումը տևեց գրեթե 11 ժամ և ավարտվեց համաձայնագրի ընդունմամբ, որը հակամարտության կարգավորման չորս կետ է պարունակում։ Մասնավորապես, կողմերը պայմանավորվել են, որ հոկտեմբերի 10-ին, ժամը 12։00-ից սկսած հումանիտար նպատակներով հրադադար կհաստատվի ռազմագերիներին, այլ պահվող անձանց և զոհվածների մարմինները փոխանակելու համար՝ Միջազգային Կարմիր խաչի չափանիշներին համապատասխան։
Առաջընթացի մասին խոսելն անհնար կլիներ առանց այս իրավիճակին վերջնակետ դնելու. Մնացականյան
