ԵՐԵՎԱՆ, 21 հոկտեմբերի – Sputnik. Բանկերն ու վարկային կազմակերպություններն իրենց հայեցողությամբ կներեն զոհված զինծառայողների և հաշմանդամություն ձեռք բերածների վարկային պարտականությունները։ Ազգային ժողովում «ՀՀ հարկային օրենսգրքում լրացումներ կատարելու մասին» ՀՀ օրենքի նախագծի քննարկման ժամանակ ասաց ֆինանսների փոխնախարար Արման Պողոսյանը։
«Հարցն այն է, որ գործնականում հնարավոր էլ չէ պարտադրել կողմերից մեկին։ Խոսքը հնարավորությունների և նպաստավոր պայմանների մասին է, և բանկերն իրենց հայեցողությամբ կարող են ներել վարկային պարտավորությունները` առանց հարկային հետևանքներ կրելու»,–ասաց փոխնախարարը։
Նրա խոսքով` այսօր օրենքի առաջին ընթերցման ժամանակ թյուրըմբռնում է եղել, և շատերը մտածել են, որ բանկերը բոլոր զոհվածների վարկերն են մարելու։
Նշենք, որ խորհրդարանը նախագիծն ընդունեց 75 կողմ ձայնով։
ԱԺ–ն քննարկում էր նաև «Ռազմական դրության ժամանակահատվածում հարկային արտոնություններ սահմանելու մասին» նախագիծը, որով սահմանվում է կազմակերպիչների և անհատների կողմից ԵԱՏՄ երկրներից ներմուծվող և պետությանը հումանիտար կարգով փոխանցվող ապրանքների շղթայում հարկային պարտավորությունները հանելը։ Հարկերից ազատվում են, եթե Հայաստան են ներմուծում կառավարության կողմից սահմանված ապրանքատեսակները և դրանք փոխանցում երեք գերատեսչությունների` պաշտպանության, արտակարգ իրավիճակների և առողջապահության նախարարություններին:
Ռազմարդյունաբերական ընկերություններն աշխատում են 24/7 ռեժիմով
Պողոսյանը հայտնեց` առաջարկություն են ստացել, որ պետք է վերոհիշյալ ցանկում ավելացնել նաև տարածքային կառավարման և ենթակառուցվածքների, ինչպես նաև բարձր տեխնոլոգիական արդյունաբերության նախարարությունները։ Փոխնախարարի խոսքով` պետությանն անհրաժեշտ ապրանքներ նվիրաբերելու դեպքում այդ արտոնությունը վերաբերելու է բոլորին։
Նշենք, որ որոշման նախագիծն ընդունվեց 74 կողմ ձայնով։
ՀՀ կառավարությունն արգելք է դրել թուրքական ծագում ունեցող ապրանքների ներմուծման վրա
