ԵՐԵՎԱՆ, 28 հոկտեմբերի - Sputnik. ՀՀ ԱԺ-ն այսօր արտահերթ նիստում երկրորդ ընթերցմամբ և ամբողջությամբ ընդունեց կառավարության առաջարկած բոլոր նախագծերը: Նշենք, որ ներկայացված բոլոր նախագծերը խորհրդարանն առաջին ընթերցմամբ ընդունել էր հոկտեմբերի 27-ի երեկոյան գումարված արտահերթ նիստում:
Հաստատված նախագծերից առաջինը «Ռազմական դրության իրավական ռեժիմի մասին» ՀՀ օրենքում լրացումների նախագիծն է, որով սահմանվում է, որ ռազմական դրության ժամանակ պետության կարիքների դեպքում պետությունը կարող է օգտագործել ֆիզիկական և իրավաբանական անձանց գույքը: Իսկ դրա ավարտից հետո կա՛մ գույքը վերադարձնել սեփականատիրոջը, կա՛մ փոխհատուցել վնասը:
Երկրորդը «Պաշտպանության մասին» ՀՀ օրենքի ու կից նախագծորի փաթեթն է, որով սահմանվում է Հայաստանում աշխարհազորի գործունեության կարգը, պայմանական ստորաբաժանումների ու դրանց հրամանատարության մեխանիզմները:
Երրորդը Քրեական օրենսգրքի զինվորական հանցանքների՝ դասալքության, ծառայության վայրը ինքնակամ լքելու, հրամանին չենթարկվելու համար նախատեսված պատիժները խստացնող նախագիծն է:
Ռազմական դրության ժամանակ պետությունը կարող է ժամանակավորապես վերցնել քաղաքացիների գույքը
Դրանով ժամկետային զինվորական կամ այլընտրանքային ծառայությունից, վարժական հավաքներից կամ զորահավաքային ծառայությունից խուսափելու համար գործող երեքից ութ տարի ազատազրկման փոխարեն առաջարկվում է սահմանել վեցից տասներկու տարվա ազատազրկմամբ:
Պատերազմի ժամանակ հրամաններ կատարելուց կամ հարկեր վճարելուց խուսափելու համար գործող առավելագույնը 4 տարվա ազատազրկման փոխարեն առաջարկվում է սահմանել 5 տարվա ազատազրկում:
Զինվորական հրամանը չկատարելու համար սահմանված հինգից տասնհինգ տարի ազատազրկման փոխարեն կառավարությունն առաջարկում է կիրառել ութից տասնհինգ տարվա, զորամասը կամ ծառայության վայրն ինքնակամ թողնելու համար սահմանված երեքից ութ տարվա ազատազրկման փոխարեն՝ վեցից տասներկու, և դասալքության համար սահմանված վեցից տասներկու տարվա փոխարեն` ութից տասնհինգ տարվա ազատազրկում:
ԱԺ-ն ընդունեց նաև «Վարձկանների հավաքագրման, օգտագործման, ֆինանսավորման և ուսուցման դեմ միջազգային կոնվենցիան վավերացնելու մասին» նախագիծը։
Ադրբեջանի օգտին լրտեսություն կատարած երկու անձինք կալանավորված են. ԱԱԾ
Հայաստանը հույս ունի, որ կոնվենցիայի վավերացմամբ կկարողանա այն օգտագործել Ադրբեջանի դեմ, որն, ի դեպ, դրան միացել է դեռ 1997թ-ից, ինչպես նաև Թուրքիայի դեմ, որը թեև չի վավերացրել կոնվենցիան, բայց հանդիսանում է Ադրբեջանի հանցակից կողմ, որը փաստացի մասնակցում է վարձկանների հավաքագրման, ֆինանսավորման, ուսուցանման, Ադրբեջան ուղարկելու և Արցախի դեմ օգտագործելու գործում:
