ԵՐԵՎԱՆ, 3 նոյեմբերի - Sputnik. ՀՀ Էկոնոմիկայի նախարար Տիգրան Խաչատրյանն այսօր ԱԺ–ում անդրադառնալով Թուրքիայից ներկրումների ժամանակավոր արգելքին՝ ասաց, որ հայաստանցի գործարարները կարող են որոշակի խնդիրներ ունենալ։
«Մի խումբ բիզնեսներ, որոնք մասնագիտացված էին այդ շուկայից ապրանք ներկրելով ու Հայաստանում վաճառելով, իրենք մինչև վերադասավորվեն, մյուս շուկաներից ներկրողները կարող է այդ պահանջարկը բավարարել»,– նշեց նախարարը։
Խաչատրյանը չբացառեց, որ Թուրքիայից ապրանք ներկրող գործարարները պետական աջակցության կարիք կունենան։ Առաջին հերթին կառավարությունը նախատեսում է խորհրդատվական աջակցություն տրամադրել վերջիններին, բայց չի բացառվում, որ նաև ֆինանսական աջակցության հարցը քննարկվի։
«Եթե ընթացքում ի հայտ գա այնպիսի իրավիճակ, որ այդ կազմակերպությունների մի մասն ունենա նաև ֆինանսական խնդիրներ, պատրաստ ենք լինելու քննարկել նաև դրանք»,– ասաց նախարարը։
Խաչատրյանը հայտնեց, որ այդ խնդիրները քննարկվել են նաև կառավարությունում։ Գործադիր մարմնում հույս ունեն, որ Թուրքիայից ներկրվող ամբողջ ապրանքը չի փոխարինվի մեկ այլ երկրից ներկրմամբ, այլ գոնե դրա մի մասը կփոխարինվի նաև տեղական արտադրության ապրանքներով։
Հիշեցնենք` հոկտեմբերի 20-ին ՀՀ կառավարությունը որոշում էր ընդունել արգելելու թուրքական ծագում ունեցող ապրանքների ներմուծումը։ Որոշումն ուժի մեջ կմտնի 2020 թվականի դեկտեմբերի 31-ից:
Նշենք, որ 2019 թվականին Թուրքիայից Հայաստան ներմուծումն ըստ ծագման երկրի հատկանիշի կազմել է 268.1 մլն ԱՄՆ դոլար։
Թուրքիայից մեր երկիր հիմնականում ներմուծվում է hագուստ (69.4 մլն դոլար), ցիտրուսային մրգեր (10.3 մլն դոլար), մեքենաներ, սարքավորումներ և մեխանիզմներ` էլեկտրական ջեռուցիչ, սառնարան (35.3 մլն դոլար), նավթ և նավթամթերք (24.3 մլն դոլար), քիմիայի և դրա հետ կապված այլ նյութեր։
Ի՞նչ է LC Waikiki–ն՝ պարզապես լավ գովազդային արշավ. ինչպես ազատվել թուրքական ապրանքից
