17:02 29 նոյեմբերի 2020
Ուղիղ եթեր
  • USD508.21
  • GBP678.82
  • EUR605.94
  • RUB6.70
Հայաստան
Ստանալ կարճ հղումը
Իրադրությունը Հայաստանում և Արցախում հայտարարության ստորագրումից հետո (556)
228 0 0

Այս փաստը, Լիլիթ Գալստյանի խոսքով, որոշ փոփոխություններ է մտցրել իրենց նախապես պլանավորած օրակարգում։

ԵՐԵՎԱՆ, 12 նոյեմբերի – Sputnik. Այսօր ժամը 12։00-ին նախանշված 17 ընդդիմադիր կուսակցությունների համատեղ ասուլիսից առաջ ԱԱԾ աշխատակիցները ՀՅԴ գրասենյակից ԱԱԾ են հրավիրել ընդդիմության ևս 3 անդամների։ Տեղեկությունն այսօր ՀՅԴ գրասենյակում կայացած ասուլիսում հայտնեց ՀՅԴ ԳՄ անդամ Լիլիթ Գալստյանը։

«Ասուլիսից րոպեներ առաջ ՀՅԴ գրասենյակ եկան ԱԱԾ ներկայացուցիչներ ու ծառայություն հրավիրեցին Արծվիկ Մինասյանին, հանդիպեցին Արսեն Բաբայանին, որը ներկայացնում է «Հայրենիք» կուսակցությունը։ Այնուհետև «Ազգային օրակարգի» ՔԽ նախագահ Արա Հակոբյանին։ Ինչպես հասկանում եք` քաղաքական բանտարկյալների բույլը մեր հանրապետությունում մեծանում է»,– հայտարարեց Գալստյանը։

Այս փաստը, Լիլիթ Գալստյանի խոսքով, որոշ փոփոխություններ է մտցրել իրենց այսօրվա նախապես պլանավորած օրակարգում։

Հիշեցնենք` նոյեմբերի 12–ին օրենքով սահմանված կարգի խախտմամբ հավաքներ կազմակերպելու և անցկացնելու փաստի առթիվ հարուցված քրեական գործի շրջանակներում ձերբակալվել են ԲՀԿ նախագահ Գագիկ Ծառուկյանը, «Ազգային անվտանգություն» կուսակցության նախագահ Գառնիկ Իսագուլյանը, «Դեմոկրատական այլընտրանք» կուսակցության քաղխորհրդի նախագահ Սուրեն Սուրենյանցը, ՀՅԴ ԳՄ անդամ Գեղամ Մանուկյանը, Մասիսի նախկին քաղաքապետ Դավիթ Համբարձումյանը, ԱԺ նախկին փոխնախագահ Արա Սահակյանը, ԱԱԾ նախկին տնօրեն, «Հայրենիք» կուսակցության նախագահ Արթուր Վանեցյանը, ՀՀԿ ԳՄ անդամ Էդուարդ Շարմազանովը, «Մեկ Հայաստան» կուսակցության նախագահ Արթուր Ղազինյանը, ՀՅԴ ԳՄ ներկայացուցիչ Իշխան Սաղաթելյանը։

Իսկ հավաքի կազմակերպիչներից` քաղաքական ակտիվիստներ Վահագն Չախալյանն ու Հրաչյա Ղուկասյանը քրեական գործով ներգրավվել են որպես կասկածյալներ։ Նրանց նկատմամբ որպես խափանման միջոց է ընտրվել ստորագրություն չհեռանալու մասին:

Հայաստանյան 17 կուսակցություններ նոյեմբերի 11–ին, ժամը 13:00-ին Երևանի Ազատության հրապարակում հանրահավաք էին կազմակերպել, որի թեման պատերազմի դադարեցման մասին որոշումն ու դրա հետ կապված հետագա անելիքներն էին։

Մինչ այդ 17 կուսակցությունների խորհուրդը պահանջել էր վարչապետ Նիկոլ Փաշինյանի և կառավարության հրաժարականը:

Այդ 17 կուսակցություններն են «Ազատությունը», «Ազգային անվտանգությունը», «Ազգային օրակարգը», «Ազգային ժողովրդավարական միությունը», «Ազգային համաձայնությունը», «Ալյանս առաջադիմական ցենտրիստականը», «Բարգավաճ Հայաստանը», «Դեմոկրատական այլընտրանքը», «Երկիր Ծիրանին», «Հայ Յեղափոխական Դաշնակցությունը», «Համերաշխությունը», «Հայաստանի ժողովրդավարական ազատական միությունը», «Հայաստանի Հանրապետականը», «Հայաստանի քրիստոնեա-դեմոկրատական միությունը», «Հայրենիքը», «Մեկ Հայաստանը» և «Սահմանադրական իրավունք միությունը»:

Ոստիկանությունը և դատախազությունը հայտարարել էին, որ ռազմական դրության ժամանակ արգելված է հավաքներ իրականացնելը։ Հանրահավաքը վերածվեց քայլերթի։ Ցուցարարները շարժվեցին դեպի կառավարության շենք, ապա Ազգային ժողով։

Հիշեցնենք` նոյեմբերի 9-ին ՌԴ նախագահ Վլադիմիր Պուտինը, ՀՀ վարչապետ Նիկոլ Փաշինյանը և Ադրբեջանի նախագահ Իլհամ Ալիևը համատեղ հայտարարություն են ընդունել ռազմական գործողությունների դադարեցման վերաբերյալ։

ՀՀ վարչապետ Նիկոլ Փաշինյանը Facebook–ի իր էջում գրել էր, որ անձամբ իր և բոլորի համար չափազանց ծանր որոշում է կայացրել:

Փաշինյանի հայտարարությունից հետո բազմաթիվ մարդիկ շարժվել են դեպի Հանրապետության հրապարակ, մի խումբը ներխուժել է կառավարության գլխավոր մասնաշենք ու վարչապետի աշխատասենյակ, մի մասն էլ շարժվել է դեպի Բաղրամյան պողոտա ու մտել Ազգային ժողովի շենք։ ԱԺ նախագահ Արարատ Միրզոյանը ծեծի է ենթարկվել, նրան տեղափոխել են հիվանդանոց։

Այս գործով արդեն կան ձերբակալվածներ։

թեմա:
Իրադրությունը Հայաստանում և Արցախում հայտարարության ստորագրումից հետո (556)

Ըստ թեմայի

Մենք այս պատերազմում չհաղթելու իրավունք չունենք. ՀՅԴ
Փաշինյանը հոկտեմբերի 29-ին կապիտուլյացիայի մասին էր խոսում. ՀՅԴ
Հիմնական պատասխանատուն գործող իշխանությունն է. նախագահը հանդիպել է ՀՅԴ–ականների հետ
թեգերը:
Արցախ, ՀՀ ազգային անվտանգության ծառայություն. ԱԱԾ, Հայ Յեղափոխական Դաշնակցություն (ՀՅԴ), Արծվիկ Մինասյան

Գլխավոր թեմաներ