ԵՐԵՎԱՆ, 14 նոյեմբերի – Sputnik. Իրավապահ համակարգի ներկայացուցիչները հենց հիմա ներխուժեցին Արթուր Վանեցյանի ծնողների բնակարան խուզարկություն իրականացնելու նպատակով: Տեղեկությունը հայտնում է «Հայրենիք» կուսակցության մամուլի խոսնակ Սոս Հակոբյանը։
«Սա «Հայրենիք» կուսակցությունը քաղաքական իմաստով գլխատելու փորձ է, որը դատապարտված է անհաջողության: Մեր պայքարը չի կանգնելու իշխանական որևէ ապօրինության արդյունքում»,– Facebook–ի իր էջում գրել է նա:
Նշենք, որ երեք օր անընդմեջ Ազատության հրապարակում հանրահավաքներ էին կազմակերպվում։ Ցուցարարները պահանջում էին վարչապետ Նիկոլ Փաշինյանի հրաժարականը։ Հիշեցնենք՝ բողոքի ալիքը հասունացավ այն բանից հետո, երբ հայտնի դարձավ պատերազմական գործողությունների դադարեցման շուրջ ընդունված եռակողմ հայտարարության մասին։
Վանեցյանը նոյեմբերի 11-ին հրավիրվեց ԱԱԾ, ձերբակալվեց, իսկ նոյեմբերի 12-ին ազատ արձակվեց։
Նա մեղադրվում է ՀՀ քրեական օրենսգրքի 225.1–րդ հոդվածի 1-ին մասով (չարտոնված հանրահավաքի կազմակերպում և մասնակցություն) և 307.1–րդ հոդվածի 1-ին մասով (պետական գաղտնիք պարունակող փաստաթղթերի կամ համակարգչային տեղեկատվության հետ վարվելու կանոնները խախտելը)։
Նոյեմբերի 13-ին Վանեցյանը հրավիրվեց Հատուկ քննչական ծառայություն, որտեղից դուրս գաւոց հետո հայտնեց, որ օրենքով սահմանված կարգի խախտմամբ հավաք կազմակերպելու և անցկացնելու վերաբերյալ հարուցված քրեական գործով հարցաքննվել է որպես կասկածյալ։
