ԵՐԵՎԱՆ, 30 նոյեմբերի - Sputnik. ՀՀ էկոնոմիկայի նորանշանակ նախարար Վահան Քերոբյանը պնդում է, որ մարդիկ սխալ են հասկացել իր ասածը։
«Ես ասել եմ, որ կբացվեն ճանապարհները, մենք պետք է պատրաստ լինենք, կրթվենք, սովորենք, մոդեռնիզացնենք մեր տնտեսությունը և այլն, ու միգուցե մի օր բացվեն նաև այդ ճանապարհները,– ասաց նա լրագրողներին, որոնք այսօր փորձեցին ճշտել` ինչ նկատի ունի Քերոբյանը, երբ ասում է` միգուցե կբացվեն ճանապարհները։– Ես մանիպուլյատիվ և անիմաստ խոսակցությունների վրա չեմ պատրաստվում ժամանակ վատնել»։
Նշենք, որ օրերս Քերոբյանը Հանրային հեռուստաընկերության եթերում խոսել էր սահմանների բացման հնարավորությունների մասին։
Թուրքական ապրանքներից ազատված շուկայում «ձուկ բռնելու» հնարավորություններ կան. նախարար
«Սահմանների բացումը լայն հնարավորություն է ընձեռելու. մեր արտահանողները կարող են իրենց արտադրանքը արտահանել Ռուսաստան և այլ երկրներ ավելի հարմար ճանապարհներով, քան մինչև հիմա են անում։ Բացվելու են թուրքական նավահանգիստները և ընձեռվելու են բազմաթիվ լայն հնարավորություններ։ Միգուցե նաև բացվի Ադրբեջանի շուկան մեզ համար և մեր շուկան՝ Ադրբեջանի համար, և պետք են գալու մարդիկ, որ կարողանան օգտվել դրանից»,–ասել էր նա։
Ըստ նախարարի` պատրաստվում են ստեղծել նման ծրագիր, որը մեզ կպատրաստի քաղել այն բոլոր օգուտները, որոնք կարող են լինել տարածաշրջանի ապաշրջափակումից։
Պիտի հասկանանք` ինչ ենք կորցրել, և գտնենք դրանք վերականգնելու մեխանիզմները. Վահան Քերոբյան