ԵՐԵՎԱՆ, 7 դեկտեմբերի – Sputnik. ՀՀ նախագահ Արմեն Սարգսյանը հանդիպել է ֆրանսիացի բժիշկների խմբի հետ և քննարկել պատերազմում վիրավորված և հաշմանդամություն ստացած զինծառայողների բուժման, նրանց առողջության վերականգնման, վերջույթների պրոթեզավորման հետ կապված հարցեր: Տեղեկությունը հայտնում է ՀՀ նախագահի մամուլի ծառայությունը։
Նախագահ Սարգսյանը հատկապես բարձր է գնահատել այս ուղղությամբ գործունեություն ծավալող բոլոր կենտրոնների աշխատանքը՝ նշելով, որ այս տարիների ընթացքում և հատկապես Ապրիլյան պատերազմից հետո նրանք հսկայական աշխատանք են կատարել և այսօր էլ մեծ աշխատանք ունեն անելու:
Նախագահի խոսքով՝ հաշվի առնելով վիրավորների և բուժօգնության կարիք ունեցողների մեծ թիվը՝ այսօր անհրաժեշտ է աջակցել նման կենտրոններին, Հայաստան բերել նորագույն տեխնոլոգիաներ, համագործակցված աշխատել նրանց հետ՝ տեղում իրականացնելու համապատասխան օգնության կարիք ունեցող զինծառայողների պրոթեզավորման գործընթացը:
«Սարգսյանը նշել է, որ պատրաստ է աջակցել նման կենտրոններին՝ համագործակցության հնարավորություն ստեղծել տարբեր երկրների նմանատիպ կենտրոնների ու մասնագետների, այդ թվում՝ Ֆրանսիայի մասնագետների հետ, ինչպես նաև հեռանկարում ունենալ տեղում համապատասխան պարագաների արտադրության կազմակերպումը»,–նշված է հաղորդագրության մեջ:
2 անգամ հայտնվել են շրջափակման մեջ, դուրս եկել առանց կորուստների՝ տանելով նաև վիրավորներին
Սարգսյանը շնորհակալություն է հայտնել ֆրանսիացի բժիշկներին՝ այս բարդ ու ծանր շրջանում հայ ժողովրդի կողքին գտնվելու ու վիրավորներին բուժօգնություն ցուցաբերելու համար: Նա միաժամանակ իր շնորհակալությունն է փոխանցել նախագահ Մակրոնին:
«40 րոպե ավելի ծանր վիրավորներին ենք դուրս բերել». վիրավոր Ժորան կրկին քայլել է սովորել
Հիշեցնենք, որ նոյեմբերի 22-ին Փարիզից Երևան էր ժամանել հումանիտար օգնության ինքնաթիռը։ Այն բերել է բժշկական սարքավորումներ, մասնավորապես՝ շարժական բուժկետ, որը թույլ է տալիս բուժել 500 հիվանդի, ինչպես նաև ծածկոցներ և հիգիենայի պարագաներ։ Օգնության հետ միասին Հայաստան էին ժամանել նաև ֆրանսիացի վիրաբույժներ։
