ԵՐԵՎԱՆ, 20 դեկտեմբերի – Sputnik. Հանրապետության նախագահ Արմեն Սարգսյանն այսօր այցելել է Եռաբլուր զինվորական պանթեոն։ Տեղեկությունը հայտնում է նախագահի կայքը։ Նա հարգանքի տուրք է մատուցել Արցախյան ազատամարտում իրենց կյանքը հայրենիքի պաշտպանության համար զոհաբերած հերոսների հիշատակին, ծաղիկներ դրել նրանց գերեզմաններին:
Նախագահ Սարգսյանն իր խոսքում նշել է, որ բոլոր դժբախտությունները պետք է դասեր լինեն, այլ ոչ թե ցավոտ հիշողություններ։
«Շատ դժվար օրեր են։ Հույս ունեմ, որ 2020 թվականի ավարտի հետ մենք փակելու ենք ողբերգական ու դժբախտ էջը և կարողանալու ենք ոտքի կանգնել, նոր էջ բացել։ Միակ բանը, որ հիշելու ենք 2020 թվականից, սուրբ հիշատակն է այն մարդկանց, ովքեր իրենց կյանքը տվեցին Հայրենիքը պաշտպանելու համար։ Պետք է նորից սկսենք մեր կյանքը։ Անհամբեր սպասում եմ այս տարվա ավարտին», - ասել է Սարգսյանը։
Սարգսյանը ծաղիկներ է դրել նաև Հայաստանի Ազգային հերոսներ Վազգեն Սարգսյանի, Մոնթե Մելքոնյանի, ինչպես նաև զորավար Անդրանիկի շիրիմներին:
Հիշեցնենք՝ Հայաստանում և Արցախում եռօրյա սուգ է հայտարարված՝ Արցախյան 44-օրյա պատերազմում զոհվածների հիշատակին։
