ԵՐԵՎԱՆ, 22 դեկտեմբերի – Sputnik. Գորիսի քաղաքապետ Առուշ Առուշանյանը քիչ առաջ փաստաբան Արմեն Մելքոնյանի ուղեկցությամբ դուրս եկավ ՔԿ–ից, ուր բերման էր ենթարկվել դեկտեմբերի 21-ի վաղ առավոտից։
Արմեն Մելքոնյանը լրագրողներին հայտնեց` րոպեներ առաջ է ստացել ծանուցագիրը` Առուշանյանին որպես մեղադրյալ ներգրավելու մասին։
«Պարզվում է անգամ, որ Առուշանյանին կալանավորելու միջնորդություն է դատարան ներկայացված։ Պատկերացնում եք` ապօրինի ձերբակալումից ազատելուց անմիջապես հետո տեղեկացրեցին, որ կալանավորման միջնորդություն է ներկայացվել Երևան քաղաքի ընդհանուր իրավասության դատարան։ Մարդուն դեռ մեղադրանք ներկայացված չէ, դեռ չգիտի ինչում է մեղադրվում, բայց արդեն կալանքի միջնորդություն կա դատարան մուտք արված»,– ասաց փաստաբանը։
Գորիսի քաղաքապետն իր նկատմամբ իրավական գործընթացը որակեց իբրև «քաղաքական հետապնդում»։
«Դա սյունեցիների կամքն էր։ Այո՛, այդ մարդն իրավունք չունի մտնել Սյունիք, որովհետև սյունեցիների պահած հողը, անվտանգության հողը` Որոտանի, Շուռնուխի, Խնձորեսկի հատվածը հանձնել է թշնամուն»,– ասաց նա` մեկնաբանելով վարչապետի այցը խոչընդոտելու բողոքի ակցիան, որի կազմակերպման համար իրեն մեղադրանք է առաջադրվել։
Հիշեցնենք, որ Գորիսի քաղաքապետին բերման էին ենթարկել դեկտեմբերի 21-ի վաղ առավոտյան։ Դրանից մեկ օր առաջ նա գրառում էր կատարել Facebook–ի իր էջում՝ կոչ անելով համաքաղաքացիներին արգելել վարչապետ Նիկոլ Փաշինյանի մուտքը Սյունիք։
Կձեռնարկվեն անհրաժեշտ միջոցներ. ՄԻՊ ներկայացուցիչներն այցելել են Գորիսի քաղաքապետին
Առուշանյանի պաշտպան Արմեն Մելքոնյանը Sputnik Արմենիայի հետ զրույցում երեկ հայտնել էր, որ որևէ կապ հաստատել չի լինում նրա հետ, և նրա գտնվելու վայրի վերաբերյալ տեղեկություն չունեն։
Ավելի ուշ ՀՀ քննչական կոմիտեից հաղորդագրություն տարածվեց, որ հատկապես կարևոր գործերի քննության գլխավոր վարչությունում քննություն է տարվում՝ Գորիս համայնքի ղեկավար Առուշ Առուշանյանի կողմից օրենքով սահմանված կարգի խախտմամբ հավաք կազմակերպելու և անցկացնելու փորձ կատարելու դեպքի հանգամանքները պարզելու ուղղությամբ:
