21:28 15 հունվարի 2021
Ուղիղ եթեր
  • USD522.53
  • GBP712.78
  • EUR634.35
  • RUB7.13
Հայաստան
Ստանալ կարճ հղումը
11510

ՀՀ մարդու իրավունքների պաշտպան Արման Թաթոյանը Sputnik Արմենիայի եթերում անդրադարձել է Հայաստանի սահմաններին տեղի ունեցող գործընթացին` այն մեկնաբանելով սահմանամերձ համայնքների բնակչության կենսական իրավունքների համատեքստում։

Սահմանների որոշման հարցերը պետք է դիտարկել Ադրբեջանում հայատյացության և պետական մակարդակով կազմակերպված թշնամանքի քարոզի համատեքստում։ Sputnik Արմենիայի հետ զրույցում նման տեսակետ հայտնեց ՀՀ մարդու իրավունքների պաշտպան Արման Թաթոյանը։

«Ադրբեջանի հետ ընթացող այս «քննարկումները», ինչ–որ հարցերի ուղղությամբ որոշումների կայացումը մենք պարտադիր պետք է դիտենք այն պատերազմական հանցագործությունների, մարդկության դեմ ուղղված այն հանցագործությունների, խոշտանգումների, անմարդկային վերաբերմունքի համատեքստում, որ մեր ժողովրդի հանդեպ կատարել է Ադրբեջանի ԶՈւ–ն»,– ասաց Թաթոյանը։

ՀՀ սահմաններին տեղի ունեցող գործընթացում, ըստ նրա, ամենակարևորը սահմանային բնակավայրերի բնակիչների կենսական իրավունքների` կյանքի, ֆիզիկական անձեռնմխելիության, ֆիզիկական անվտանգության, սեփականության և այլ իրավունքների վտանգման հարցն է։

«Այս բոլոր հարցերին, ցավոք սրտի, պետական մակարդակով պատշաճ ուշադրություն ու վերաբերմունք չի ցուցաբերվում, և մոտեցումները սխալ են ընտրված»,– ասաց Թաթոյանը։

Արդյունքում GPS համակարգի կամ Google maps հավելվածով տեղորոշման պատճառով սյունեցին կարող է զրկվել սեփականության իրավունքով իրեն պատկանող տնից, հողատարածքից։

«Օրինակ` Սյունիքի, Գեղարքունիքի մարզերում այդ համակարգերի կամ այսօր տեղի ունեցող գործընթացների պատճառով մարդիկ զրկվել են իրենց կենդանիներին արոտավայրերում արածեցնելու հնարավորությունից, ինչը չափազանց կարևոր է ոչ միայն իրենց ընտանիքների կենսական կարևոր պայմանները բավարարելու, այլև որպես ձեռնարկատիրական գործունեությամբ զբաղվելու հնարավորությունից»,– ասաց Թաթոյանը։

Պաշտպանը Սյունիքի մարզի Խոզնավար գյուղ կատարած իր այցելության ընթացքում պարզել է, որ սահմանների որոշման արդյունքում հայկական այս գյուղը 3 կողմից մնացել է շրջապատված ադրբեջանական զինուժի դիրքերով։

«Եվ միայն մեկ կողմով է կապված Հայաստանի հետ։ Ընդ որում` ադրբեջանական դիրքերը շատ մոտ հարևանությամբ են։ Հիմա պարզ չէ, որ այդ մարդիկ լուրջ, արդարացի մտահոգություններ ունեն իրենց ֆիզիկական անվտանգության համար։ Նույն վիճակն է նաև Խնածախ գյուղում, որտեղ մենք եղանք, Արավուս գյուղը։ Գեղարքունիքի մարզի գյուղերում ևս այդ խնդիրները կան»,– ասաց Թաթոյանը։

Պաշտպանի դիտարկմամբ` բոլոր այս տարածքների բնակիչների մոտ այսօր մեծ է անորոշության զգացումը, ինչը, ըստ նրա, մեծապես պայմանավորված է կատարվող գործընթացների վերաբերյալ պետական բարձրագույն իշխանության կողմից պատշաճ իրազեկման բացակայությամբ։

«Շատ կարևոր է, որ պետությունն աշխատի անընդհատ, ընդ որում` ոչ թե մարզային կամ համայնքային իշխանության, այլ պետության բարձրագույն գործադիր իշխանության մակարդակով անընդհատ իրազեկումներ անի, որպեսզի մարդիկ վստահ լինեն, որ պետությունն իրենց թիկունքին կանգնած է»,– ասաց Թաթոյանը։

Սիրողական, փնթի և ոչ շահավետ լուծումներ. նախկին նախարարը` սահմանային գծանշումների մասին

Մարդու իրավունքների պաշտպանը սահմանամերձ մարզեր կատարած իր այցերի ընթացքում արձանագրել է մի կարևոր փաստ` Ադրբեջանի հետ սահմանակից դարձած բոլոր տարածքներում ՀՀ սահմանապահ զորքերն այսօր հերոսական ծառայություն են տանում` ապահովելով սահմանամերձ համայնքների բնակիչների անվտանգությունը։

Սահմաններ` առանց քարտեզի. Հայաստանը վերացրել է քարտեզագրության բոլոր հետքերը

Ըստ թեմայի

Ո՞վ է պահպանում մեր դիրքերը Դավիթ Բեկ գյուղի մոտ. նոր սահմանի և սահմանապահի լուսանկարները
Պատերազմի հետևանքով սահմանամերձ դարձած համայնքների բնակիչներն աջակցություն կստանան
Կապանի քաղաքապետը սահմանների դեմարկացիայի որևէ փաստաթուղթ չի տեսել
թեգերը:
Սահման, Արման Թաթոյան, Սյունիք, Հայաստան

Գլխավոր թեմաներ