22:41 15 հունվարի 2021
Ուղիղ եթեր
  • USD522.53
  • GBP712.78
  • EUR634.35
  • RUB7.13
Հայաստան
Ստանալ կարճ հղումը
992 0 0

Շուռնուխի 12 տները հանձնվել են Ադրբեջանին, վերջին օրն է, որ տների բնակիչները հավաքում են մնացած իրերը, որպեսզի տեղափոխվեն գյուղի, Գորիսի կամ Կապանի ազատ տներ։

ԵՐԵՎԱՆ, 4 հունվարի – Sputnik. Գորիսի փոխքաղաքապետ Մենուա Հովսեփյանը Sputnik Արմենիային հայտնեց, որ Սյունիքի մարզի Շուռնուխ գյուղի ներքևի հատվածի 12 տներն արդեն հանձնվել են ադրբեջանցիներին։

«Ոչ մի լավ նորություն չկա․․․ Ներքևի տները հանձնեցին ժողովուրդը, հիմա ապրում են հարազատների մոտ», - ասաց նա։

Նախնական համաձայնությամբ` Շուռնուխից 12 տուն պետք է հանձնվեր, ապա թիվը դարձավ 11: Սակայն, այնուամենայնիվ, այդ մեկ տան ընտանիքն էլ է դուրս եկել տարածքից։

«Դե ո՞նց կլինի` մենակ մնան իրանց մոտ։ Լրիվ անիմաստ ա։ Իրանք էլ են հավաքել իրերը, դուրս եկել։ Էսօր վերջին օրն ա, վերջին իրերն են դուրս հանում մարդիկ», - Sputnik Արմենիային ասաց Շուռնուխի գյուղապետ Հակոբ Արշակյանը։

Նրա խոսքով` ադրբեջանցիները երեք օր է՝ գտնվում են Սյունիքի մարզի Շուռնուխ գյուղի՝ արդեն իրենց տիրապետության տակ անցած հատվածում, որտեղ «պոստ» են ստեղծել։

«Էսօր վերջնական ժողով արեցինք գյուղացիների հետ, մասնակցում էին հայ սահմանապահները, ռուս խաղաղապահ մի քանի հոգի, համայնքապետարանից մարդիկ։ Ասեցինք մարդկանց, որ ոչ մի ինքնագլուխ բաներ չանեն, ճանապարհը չանցնեն, ուշադիր լինեն երեխաների, անասունների նկատմամբ, որ անզգուշությամբ չգնան էն կողմը», - ասաց գյուղապետը։

Նա ասաց, որ դեռևս ոչ մի սահման չկա Շուռնուխի հայկական և ադրբեջանական մասերի միջև։

«Ոչ մի սահման չկա, վերջնական դեռ պիտի որոշվի», - ասաց նա։

Հիշեցնենք` ՀՀ պաշտպանության նախարարությունը դեկտեմբերի 20–ին տեղեկացրեց, որ ռուս սահմանապահ ուժեր կտեղակայվեն Սյունիքի մարզի Գորիս-Կապան ավտոճանապարհի 21 կիլոմետրանոց հատվածի վիճարկելի տեղերում։ 

Դեկտեմբերի 24-ին ՀՀ կառավարության նիստում ՀՀ վարչապետ Նիկոլ Փաշինյանը հայտարարեց, որ այն, ինչ իրականացվում է Սյունիքի սահմաններին, չի կարելի համարել դեմարկացիա կամ դելիմիտացիա։ Նրա խոսքով` տեղի է ունենում սահմանային որոշակի կետերի տեղորոշում, որի նպատակն է անվտանգության ապահովումը։

Դեկտեմբերի 29–ին ադրբեջանցիները Շուռնուխի բնակիչներին 1 օր ժամանակ տվեցին գյուղի կեսը, այսինքն 12 տները ազատելու համար։ Շուռնուխի գյուղապետ Հակոբ Արշակյանը Sputnik Արմենիայի հետ զրույցում ասաց, որ այդ մեկօրյա ժամկետը Մոսկվայի միջամտությամբ վերացել է։ Նրա խոսքով` տոների հետ կապված` մինչև հունվարի 2-3-ը մարդիկ կմնան իրենց տներում։ Հետո ինչ կլինի` պարզ չէ։

Արշակյանը հունվարի 2-ին Facebook-ի ուղիղ եթերում հայտնեց, որ ադրբեջանցիները մտել են Շուռնուխ։ «Ժողովուրդ ջան, ամեն ինչ պրծավ, թուրքերը եկան։ Մնում է միայն` այս համազգեստը հանենք: Գյուղի մեջ արդեն «պոստ» են ստեղծել, մինչև ամսի 5-ը ժամանակ են տվել, դրանից հետո այստեղ մի հոգի էլ պիտի չմնա, անասունն անցնի՝ իրենցն է, մարդն անցնի՝ իրենցն է»,– հայտարարեց նա։

Գյուղապետի տունը ևս մտնում է հանձնվող 12 տների մեջ։ Նա այդ տանը վերաբնակվել է 1992 թվականին, լիովին վերակառուցել այն, այգիներ ու բոստաններ ստեղծել։

Ըստ թեմայի

Սյունիքում ունենք անվտանգային հիմնահարց. հայ–ռուսական հարաբերություններն ու Փաշինյանը
Սյունիքում այլընտրանքային ճանապարհներ կկառուցվեն. Պապիկյանը մանրամասներ է ներկայացրել
թեգերը:
Շուռնուխ, Սյունիք, Հայաստան

Գլխավոր թեմաներ