ԵՐԵՎԱՆ, 20 հունվարի – Sputnik. Հատուկ քննչական ծառայությունը կարճել է Ազգային անվտանգության ծառայության նախկին տնօրեն Արթուր Վանեցյանին առնչվող քրեական գործը։ Տեղեկությունը Sputnik Արմենիայի հետ զրույցում հաստատեց ՀՔԾ մամուլի քարտուղար Մարինա Օհանջանյանը։
«Քրեական գործը կարճվել է հանցակազմի բացակայության հիմքով»,– ասաց նա։
Քրգործը վերաբերում էր ԱԱԾ նախկին տնօրենի կողմից պաշտոնեական լիազորություններն անցնելուն։
ԱԱԾ-ն 2020 թվականի հուլիսի 31-ին հայտարարություն էր տարածել` հայտնելով, որ ՀՀ ԱԱԾ նախկին տնօրենը, անտեսելով ՀՀ «Ազգային անվտանգության մարմիններում ծառայության մասին» օրենքի 16-րդ հոդվածով սահմանված տարիքային սահմանափակումները, 2018 թ. հուլիսի 18-ի հրամանով ԱԱԾ–ում պաշտոնի է նշանակել 51 տարեկան և փոխգնդապետի զինվորական կոչումով նախկինում ծառայությունից արձակված անձին: Այնինչ, ըստ «Ազգային անվտանգության մարմիններում ծառայության մասին» օրենքի 16-րդ հոդվածի պահանջների, ԱԱԾ–ում աշխատելու համար փոխգնդապետի համար սահմանված տարիքային առավելագույն շեմը 50-ն է։ Այս սահմանափակման մասին զեկուցվել է Վանեցյանին, սակայն վերջինս ցուցում է տվել ԱԱԾ-ում նրան զինվորական ծառայության ընդունելու հրամանի մասին նախագիծ պատրաստել և ներկայացնել իրեն։ Արդյունքում Վանեցյանի հրամանով տղամարդը նշանակվել է ավագ խմբի պաշտոնում՝ ստանալով նաև գնդապետի կոչում: