ԵՐԵՎԱՆ, 1 մարտի – Sputnik. Վանաձորի քաղաքապետ Մամիկոն Ասլանյանը կարծում է, որ ՀՀ զինված ուժերի գլխավոր շտաբի պետ Օնիկ Գասպարյանը գեներալի, զինվորականի ու հայրենասիրության բացառիկ օրինակ է։ Վանաձորի քաղաքապետը նման գրառում է արել ֆեյսբուքյան իր էջում` անդրադառնալով վերջին օրերի դեպքերին։
«Անկեղծ ասած, զարմանում եմ, երբ հայտարարություններ եմ կարդում բանակի կողքին լինելու վերաբերյալ։ Մենք այդ ե՞ րբ հասցրեցինք բանակից հեռանալ, որ հիմա էլ կրկին կանգնում ենք կողքին։ Բանակը ես եմ, բանակը բոլորս ենք, բանակն ազգինն է»,–գրել է նա։
Նա հավելել է, որ բանակը Հայաստանի Հանրապետության անկախության ու պետականության միակ երաշխավորն է, ուստի և` փառք հայոց բանակին։
Նշենք, որ քիչ առաջ հայտնի դարձավ, որ Սպիտակ համայնքի ղեկավար Գագիկ Սահակյանը միանում է ՀՀ վարչապետ Նիկոլ Փաշինյանի հրաժարականի պահանջին։ Ավելին, գեներալ-մայոր Հենրիկ Մուրադյանը նույնպես հայտնել է, որ հեռանում է Գեղարքունիքի մարզպետի աշխարհազորի գծով տեղակալի պաշտոնից` միանալով ԶՈւ ԳՇ-ի հայտարարությանը։
Իրադրությունը սրվեց այն բանից հետո, երբ ՀՀ ԶՈւ Գլխավոր շտաբը փետրվարի 25-ին պահանջեց ՀՀ վարչապետ Նիկոլ Փաշինյանի հրաժարականը, ասելով, որ քաղաքական ղեկավարությունը պետությունը տանում է դեպի վտանգավոր սահմանագիծ։ Դա տեղի ունեցավ այն բանից հետո, երբ վարչապետը պաշտոնից հեռացրեց Գլխավոր շտաբի պետի առաջին տեղակալ Տիրան Խաչատրյանին։
Ի պատասխան Նիկոլ Փաշինյանը հայտարարեց ռազմական հեղաշրջման փորձի մասին և քաղաքացիներին կոչ արեց հավաքվել Հանրապետության հրապարակում՝ «հեղափոխությունը պաշտպանելու» համար։
Նա հայտնեց նաև, ստորագրել է Գլխավոր շտաբի պետ Օնիկ Գասպարյանին պաշտոնից հեռացնելու փաստաթուղթը, որը, սակայն, ՀՀ նախագահ Արմեն Սարգսյանը չստորագրեց և հետ ուղարկեց փետրվարի 27–ին։ Նույն օրը վարչապետը կրկին առաջարկությունն ուղարկեց ՀՀ նախագահին։
