ԵՐԵՎԱՆ, 15 մարտի - Sputnik. ՀՀ պաշտպանության նախկին նախարար Սեյրան Օհանյանը շարունակում է բուժում ստանալ հիվանդանոցում։ Նրա պաշտպան Կարեն Մեժլումյանը Sputnik Արմենիայի հետ զրույցում հայտնեց, որ նա դեռ դուրս չի գրվել։
Ավելի վաղ հայտնել էինք, որ ՀՀ երկրորդ նախագահ Ռոբերտ Քոչարյանի և մյուսների դեմ հարուցված քրգործով նիստը, որը պետք է կայանար մարտի 9-ին Երևանի ընդհանուր իրավասության դատարանում, հետաձգվեց, քանի որ Օհանյանը վատառողջ էր։ Պաշտպանը դատարանին հայտնել էր, որ ՀՀ պաշտպանության նախկին նախարարը զինվորական կենտրոնական հոսպիտալում է։
«Սեյրան Օհանյանը դեռ պետք է բուժում ստանա հոսպիտալում, այսինքն` հիվանդանոցային պայմաններում, բժիշկների հսկողության տակ մնա։ Նրա մոտ հայմորիտ է»,–ասաց Մեժլումյանը։
Պաշտպանը հայտնեց նաև, որ Օհանյանը կորոնավիրուսի թեստ է հանձնել, սակայն արդյունքը բացասական է եղել։ Մեժլումյանը դիմել է դատարան, որպեսզի վաղը` մարտի 16-ին նախատեսված նիստը հետաձգվի։
Այժմ Օհանյանի ինքնազգացողությունը նորմալ է։
Նշենք, որ ամբաստանյալի բացակայության դեպքում դատական նիստ չի անցկացվում։
Հիշեցնենք, որ մարտի 9-ին նախորդող երկու նիստերը նույնպես հետաձգվել էին. փետրվարի 23-ին ՀՀ նախկին փոխվարչապետ Արմեն Գևորգյանը և նրա պաշտպան էին բացակայում նիստից։ Մարտի 2-ին Գևորգյանը կրկին ներկա չէր նիստին։ Նրա պաշտպան Էրիկ Ալեքսանյանը դատարանին հայտնել էր, որ պաշտպանյալի մոտ սուր շնչառական հիվանդություն է ախտորոշվել։
2008-ի ՀՀ նախագահական ընտրություններից հետո` փետրվարի 24-ին, ԿԸՀ-ն հայտարարեց, որ ընտրություններում հաղթել է Սերժ Սարգսյանը։ Օրեր շարունակ բողոքի ակցիայի մասնակիցները, որոնք նախագահի թեկնածու, ՀՀ առաջին նախագահ Լևոն Տեր-Պետրոսյանի կողմնակիցներն էին, պահանջում էին վերահաշվարկել քվեները։
Մարտի 1-ի երեկոյան ԶՈւ և ոստիկանության ստորաբաժանումները Երևանի կենտրոնական փողոցներում զենքի, պայթուցիկ սարքերի և հատուկ միջոցների օգնությամբ ցուցարարներին ցրելու համար հատուկ գործողություններ իրականացրին։ Հարյուրավոր մարդիկ վնասվածքներ ստացան, մահացան 8 քաղաքացիական անձինք և 2 ոստիկան։
10 տարի չբացահայտված մնացող քրեական գործը «թավշյա հեղափոխությունից» հետո ՀՔԾ-ում նոր թափ ստացավ։ Գործի շրջանակում մեղադրանք է առաջադրվել ՀՀ 2-րդ նախագահ Ռոբերտ Քոչարյանին, ՀԱՊԿ գլխավոր քարտուղար Յուրի Խաչատուրովին: Գործով անցնում են նաև 2008-ին ԶՈւ գլխավոր շտաբի պետ Սեյրան Օհանյանը, 2008-ին նախագահի աշխատակազմի ղեկավար, ԱԽՔ Արմեն Գևորգյանը:
