ԵՐԵՎԱՆ, 16 մարտի — Sputnik. ՀՀ Զինված ուժերի գլխավոր շտաբի պետի առաջին տեղակալ Տիրան Խաչատրյանի պաշտպանները վարչական դատարան կներկայացնեն նոր փաստաթղթեր, որոնք հաստատում են Խաչատրյանին պաշտոնից հանելու որոշման անօրինականությունը: Այս մասին Facebook-ի իր էջում հայտնել է TK & Partners իրավաբանական ընկերության ներկայացուցիչ, Խաչատրյանի շահերի ներկայացուցիչ Վարուժան Ավետիքյանը։
«Հայաստանի ազգային հերոս, գեներալ-լեյտենանտ Տիրան Խաչատրյանի նկատմամբ շարունակվում են ապօրինությունները: Պարզվում է` մինչ օրենքի հիման վրա դատարանի կողմից հայցը վարույթ ընդունելու ուժով կասեցվել է ՀՀ նախագահի համապատասխան հրամանագիրը, պաշտպանության նախարարը արձակել է ՀՀ նախագահի կասեցված հրամանագրի կատարումն ապահովող հրաման», – գրել է Ավետիքյանը։
ՊՆ ղեկավարի հրամանը Խաչատրյանի պաշտպանները կվիճարկեն մարտի 17-ին։
Տիրան Խաչատրյանին աշխատանքից ազատ արձակելու որոշումը նախագահը կայացրել է փետրվարի 24-ին ՝ վարչապետ Նիկոլ Փաշինյանի առաջարկով։ Աշխատանքից ազատվելու պատճառը գեներալ-լեյտենանտի արձագանքն էր Փաշինյանի այն հայտարարությանը, թե «Իսկանդերի» հրթիռը մարտական գործողությունների ժամանակ պայթել է 10 տոկոսով:
Տիրան Խաչատրյանի հայցը վարույթ ընդունելը նրա պաշտոնանկության որոշումը կասեցնելու հիմք է
Yerevan.today կայքը մեկնաբանության համար դիմել էր Խաչատրյանին, վերջինս էլ ծիծաղելով նշել էր, որ նման հայտարարություններն ուղղակի անլուրջ են։
Խաչատրյանի պաշտոնանկությունից հետո Գլխավոր շտաբը հանդես է եկել հայտարարությամբ, որի տակ ստորագրել են ավելի քան 40 բարձրաստիճան զինվորականներ և պահանջել վարչապետի հրաժարականը։
Վարչական դատարանը վարույթ է ընդունել Տիրան Խաչատրյանի դիմումը. ինչ է դա նշանակում
