ԵՐԵՎԱՆ, 22 մարտի — Sputnik. Արցախում արդեն փոքրածավալ ներդրումներ կան։ Այս մասին լրագրողների հետ զրույցում ասաց էկոնոմիկայի փոխնախարար Ավագ Ավանեսյանը։
«Խոսքը ծավալուն ներդրումների մասին չէ, հիմնականում անհատական, սփյուռքից քրաուդֆանդինգային ծրագրեր են։ Կարի, պահածոների արտադրամասերի մասին է խոսքը», – ասաց նախարարի տեղակալը։
Ավանեսյանի խոսքով` Թուրքիայից ապրանքների ներկրման էմբարգոն երկարաձգելու շուրջ քննարկումները շարունակվում են։
«Էմբարգոն կարճ հատված է գործում, չենք կարող դեռ գնահատել փոփոխությունները։ Բայց կատաստրոֆիկ հարված չենք տեսնում, և արգելքը երկարաձգելու խոսակցությունները գնում են», – ասաց նա։
Նա ասաց, որ Հայաստանում, ինչպես և Ադրբեջանում, պատերազմից հետո ներդրումային միջավայրը վատացել է, բայց երկիրը դեռ ունի իր խաղաքարտերը։
«Հայաստանը հետաքրքիր է ներդրողներին իր աշխատաշուկայի որակով, ԵԱՏՄ շուկա ունենալով, համեմատաբար թափանցիկ աշխատելաոճով։ Կարճաժամկետ է այս խնդիրը», – ասաց նա։
Ներդրումներ չկան. ո՞ր ոլորտները կարող են թռիչքաձև զարգացում ապահովել
Հիշեցնենք` այս տարվա հունվարի 1-ից Հայաստանում Թուրքիայից ապրանքների ներմուծման արգելք է գործում։
