ԵՐԵՎԱՆ, 30 մարտի — Sputnik. Հայաստանը պետք է հատուկ հարաբերություններ ունենա Ռուսաստանի հետ։ Այս մասին aravot.am-ի հետ զրույցում ասել է ՀՀ նախագահ Արմեն Սարգսյանը։
«Ռուսաստանի հետ պետք է ունենանք մեր հարաբերությունների ճանապարհային քարտեզ, որը հիմնված է երկկողմանի շահերի վրա: Չպետք է մոռանանք, որ խոսքը փոքր Հայաստանի և շատ ավելի մեծ հայ ժողովրդի մասին է, որը գտնվում է Կովկասում շրջափակված վիճակում: Բայց մեր ռազմավարական գործընկերն աշխարհի առաջին, երկրորդ, երրորդ կամ չորրորդ գերտերություններից մեկն է, միջուկային գերտերություն: Հետևաբար, նախ, մեր հարաբերությունները պետք է ձևավորվեն իրականության վրա», – ասել է նախագահը։
Հիմնական օրակարգը պետք է լինի ՀՀ և ՌԴ միջև վստահությունը ու կանխատեսելիությունը:
«Սա նշանակում է, որ մեր գործընկերը պետք է մեզ համարի վստահելի և կանխատեսելի: Նույն ձևով էլ մենք իրեն համարենք: Անկանխատեսելի գործընկերը գործընկեր չէ: Չպետք է խուսափենք գործընկերությունից, որը ռազմավարական է, երկարաժամկետ, հենց նույն Ռուսաստանի հետ, որովհետև սա բնական է Հայաստանի համար», – ասել է Սարգսյանը։
Նրա խոսքով` Արևմուտքում լավ են հասկանում Հայաստանի հատուկ հարաբերությունները Ռուսաստանի հետ։
«Երբ ԱՄՆ-ում Սենատի անդամների հետ խոսում ես Հայաստանի մասին, շատ ջերմ են, հետաքրքրված, պատրաստ են աջակցության, կապված են ԱՄՆ-ում համայնքի հետ, գիտեն, թե ինչ է Եղեռնը, աջակից են և այլն: Բայց, միաժամանակ, երբ խոսքը պրագմատիկ, իրական քաղաքականության մասին է, նրանք են առաջինը ասում՝ դուք հատուկ հարաբերություններ ունեք Ռուսաստանի հետ՝ ելնելով պատմությունից, անցած ճանապարհից, այսօրվա տարածաշրջանային քաղաքականությունից: Եվ այդտեղ որևէ բացասական բան նրանք չեն տեսնում», – ասել է նախագահը։
Նրա խոսքով` հատուկ հարաբերություններ ունենալով նույն Ռուսաստանի հետ, Հայաստանը կարող է շատ խորը և ջերմ հարաբերություններ ունենալ և Արևմուտքի հետ։
Ռուսաստանը շարունակում է մնալ Հայաստանի ռազմավարական դաշնակիցը. ԱԳ նախարար
