ԵՐԵՎԱՆ, 16 ապրիլի - Sputnik. Կողմերն անում են ամեն ինչ, որպեսզի եռակողմ հայտարարության բոլոր կետերն իրականություն դառնան։ Այսօր այս մասին ԱԺ–ում լրագրողների հետ զրույցում ասաց ՀՀ փոխվարչապետ Մհեր Գրիգորյանը։
Խոսելով 2020թ.–ի նոյեմբերի 9–ին ստորագրված եռակողմ հայտարարության կատարման ընթացքի ու դրանում Մոսկվայի ունեցած դերի մասին` փոխվարչապետն ասաց.
«Ինձ բավարարում է այնքանով, որքանով ես տեսնում եմ պատրաստակամություն ամենաբարձր մակարդակով, բազմաթիվ փորձեր խնդիրը լուծելու համար։ Դա արդեն իսկ, եթե չասենք լիարժեք, ապա գոնե պետք է ֆիքսենք, որ նման հանգամանք կա, ինչի համար պետք է շնորհակալ լինենք նաև»։
Հարցին, թե արդյո՞ք Ադրբեջանը գերիների վերադարձի դիմաց նախապայման դնում է, Գրիգորյանը պատասխանեց.
«Ես կխոսեմ իմ հարթակի տեսանկյունից, որտեղ նման հարց չի քննարկվել»։
Ինչ վերաբերում է ապաշրջափակման ուղղությամբ տարվող աշխատանքներին, որոնց վերաբերյալ մինչև մարտի վերջ նախատեսված էր ունենալ ամփոփ զեկույց, Մհեր Գրիգորյանը հայտնեց, որ աշխատանքի ընթացքում ի հայտ են եկել բազմաթիվ հարցեր ու տեխնիկական բնույթի դետալներ, որոնք ենթակա են փորձագիտական ուսումնասիրման, որը, նրա խոսքով, նույնպես ժամանակատար պրոցես է։
«Հակառակ դեպքում` որոշումները կա՛մ չեն կայացվի, կա՛մ չեն իրականանա, որովհետև հետո կպարզվի, որ այն, ինչ որոշվել է, անհնարին է իրականացնել»,– ասաց Գրիգորյանը։
Հիշեցնենք, որ 2021 թվականի հունվարի 11-ին Մոսկվայում կայացավ Հայաստանի վարչապետ Նիկոլ Փաշինյանի, Ռուսաստանի նախագահ Վլադիմիր Պուտինի, Ադրբեջանի նախագահ Իլհամ Ալիևի հանդիպումը։
Ապաշրջափակման անվան տակ խորը շրջափակում է լինելու. Օհանյանը` ԱԽՔ–ի հայտարարության մասին
Գրեթե 4 ժամ տևած բանակցությունների արդյունքում ընդունվեց եռակողմ հայտարարություն, որը հիմնականում վերաբերում էր 2020-ի նոյեմբերի 9-ի հայտարարության 9-րդ՝ տարածաշրջանում բոլոր տնտեսական և տրանսպորտային կապերն ապաշրջափակելու վերաբերյալ կետի իրագործմանը։
Եռակողմ նոր հայտարարության մեջ նշվում է, որ 3 երկրների փոխվարչապետների համանախագահությամբ ստեղծվում է աշխատանքային խումբ, որի առաջին հանդիպումը կանցկացվի մինչև 2021 թ.-ի հունվարի 30-ը։
Հանդիպման արդյունքների հիման վրա կկազմվի 9-րդ կետի կիրառումից բխող աշխատանքների հիմնական ուղղությունների ցանկը՝ որպես գերակայություններ ընդունելով երկաթուղային և ճանապարհային հաղորդակցությունները, ինչպես նաև կսահմանվի Հայաստանի, Ադրբեջանի ու Ռուսաստանի միջև համաձայնեցված այլ ուղղություններ:
«Ապաշրջափակման» անվան տակ Թուրքիան իրագործում է Թուրանի գաղափարը. Բոստանջյան
