ԵՐԵՎԱՆ, 5 մայիսի- Sputnik. ՀՀ իրավապահները երբեմն կոռուպցիոներների նկատմամբ անհարկի ներողամտություն են դրսևորում։ Այսօր ԱԺ նիստում կառավարության անդամների հետ հարցուպատասխանի ժամանակ նման տեսակետ հայտնեց ՀՀ վարչապետի պաշտոնակատար Նիկոլ Փաշինյանը` պատասխանելով «Լուսավոր Հայաստան» խմբակցության անդամ Արմեն Եղիազարյանի` Հաշվեքննիչ պալատի վերջին բացահայտումների մասին հարցին։
«Ողջունում եմ ՀՊ–ի բացահայտումները և հույս ունեմ, որ դուք էլ կհետևեք, որ արվի պատշաճ քննություն և բոլոր մեղավորները ենթարկվեն քրեական պատասխանատվության»,– ասաց Փաշինյանը։
Նա նաև շեշտեց, որ անգամ իր կուսակիցների թույլ տված չարաշահումների նկատմամբ ներողամտություն չի դրսևորել։
«Իմ կողմից նշանակված երկու պաշտոնյա արդեն 1.5 տարի բանտում են, կաշառք վերցնելու, ատկատներ անելու համար` իմ քաղաքական թիմի անդամ, իմ քաղաքական մերձավոր ու իմ կողմից նշանակված մարդ»,– ասաց Փաշինյանը։
Հիշեցնենք` ՀՀ աշխատանքի և սոցիալական հարցերի նախարարության ֆինանսատնտեսական գործունեության հաշվեքննության արդյունքները Հաշվեքննիչ պալատն ուղարկել է ՀՀ գլխավոր դատախազություն։ Որոշումը կայացվել է ՀՊ արտահերթ նիստում` մարտի 30-ին։
ՀՀ–ում քանի պաշտոնյա և հանրային ծառայող է քրեական հետապնդման ենթարկվել կոռուպցիոն գործերով
Sputnik Արմենիան ևս ուսումնասիրել էր առերևույթ հանցագործության փաստեր պարունակող 266 էջանոց հաշվեքննությունն ու առավել հետաքրքիր փաստերը ներկայացրել իր ընթերցողին։
