ԵՐԵՎԱՆ, 10 մայիսի – Sputnik. Այս տարի հուլիսին Սևանա լճի մակարդակն ամենաբարձրը կլինի վերջին 60 տարվա ընթացքում։ Այսօր ԱԺ–ում հայտարարեց «Իմ քայլը» խմբակցության կողմից երկրորդ անգամ վարչապետի թեկնածու առաջադրված ՀՀ վարչապետի պաշտոնակատար Նիկոլ Փաշինյանը` խոսելով իրենց իշխանության 3 տարվա ձեռքբերումների մասին։
«Ասում են` դե, անձրև շատ է եկել, ձյուն շատ է եկել, դրա համար էլ Սևանի մակարդակն այդքան բարձր է լինելու։ Փաստորեն վերջին 60 տարում Հայաստանում ո՛չ ձյուն էր եկել, ո՛չ անձրև։ Անձրև և ձյուն ՀՀ–ում, տիկնայք և պարոնայք, տեղացել է միայն 2020-21թթ–ին։ Կամ էլ Եղիա մարգարեի ժամանակների երաշտից է եղել։ Այն ժամանակ 30 տարի էր, այս անգամ 60 տարի էր»,– ասաց Փաշինյանը։
Նա նաև հայտնեց, որ իրականում դա արդյունք է ջրային ռեսուրսների կառավարման նոր որակի։ Երբ 2020թ–ին 22.8 խմ ավելի քիչ ջուր է բաց թողնվել ոռոգման համակարգ, բայց 4800 հա հողատարածք ավելի է ոռոգվել։
Փաշինյանի նշանակած կադրերից մեկը Ռոբերտ Քոչարյանի հետ է, մյուսը` Սերժ Սարգսյանի. Մարուքյան
«Որովհետև Սևանից բաց թողնված ջրի հաշվին մեզանից ոչ ոք միլիոնատեր չի դարձել։ Եթե դուք խոսեք էներգետիկ համակարգի ներկայացուցիչների հետ, նրանք կասեն, որ կա օդում պտտվող խոսակցություն, որ երբ Սևանա լճի 1 սմ ջուրը բաց է թողնվում համակարգ և դառնում է էլեկտրական էներգիա, այն վերածվում է 1 մլն դոլարի»,– ասաց Փաշինյանը։
Նա նաև հայտնեց, որ հիդրոէներգետիկ համակարգում 2018թ–ից ի վեր 30 մլն ԿՎտ/ժամ էլեկտրաէներգիա է խնայվել, իսկ ջրի կորուստները նվազել են 3 տոկոսով։
Փաշինյանին ուղեկցող մեքենաներից մեկը վթարի է ենթարկվել. լուսանկարներ
Հիշեցնենք` Հիդրոօդերևութաբանության և մոնիթորինգի կենտրոնը ապրիլի 25-ին տեղեկացրել էր, որ Սևանա լճի մակարդակն ապրիլի 19-25-ն ընկած ժամանակահատվածում բարձրացել է 2 սանտիմետրով` կազմելով 1900.72 մետր։
ՀՀ շրջակա միջավայրի նախարար Ռոմանոս Պետրոսյանն էլ ավելի վաղ հայտնել էր, որ լճի մակարդակի առավելագույն նիշը հունիս–հուլիս ամիսներին է սահմանագծվում, սակայն այս տարվա կանխատեսումով` վերջին տասնամյակների համար աննախադեպ ցուցանիշ ենք ունենալու` Սևանի մակարդակը հասնելու է 1901 մետրի։
