ԵՐԵՎԱՆ, 12 մայիսի- Sputnik. Շիրակի մարզպետ, ՔՊ անդամ Հովհաննես Հարությունյանը «թվեր ապահովվելու» հանձնարարական ՔՊ-ից չի ստացել, ընտրություններում վարչական ռեսուրսներ չի կիրառելու: Այս մասին նա ասաց աշխատանքային հարյուր օրվա ամփոփման ժամանակ։ Հարությունյանը նշեց` քանի որ ղեկավարելու է ՔՊ մարզային շտաբը, որպես մարզպետ կլինի արձակուրդում:
«Ես այս պահին ունեմ հստակ պարտականություն` կազմակերպելու Շիրակի մարզում ՔՊ կուսակցության մասնակցությունը ընտրություններում։ Որպես մարզային շտաբի պետ` ես հետևելու եմ, որ ընտրություններին կամ նախընտրական շրջանում չլինեն այնպիսի քայլեր և գործընթացներ, որոնք կվնասեն ընտրությունների «ռեյտինգին»»,-նշեց մարզպետը։
Նա նշեց` «ավանդական» ընտրությունները մնացել են պատմության մեջ և եթե կան ուժեր, որոնք նման մտավախություն ունեն, ապա դա ասում են իրենց փորձից:
«Մենք ի վերջո որպես քաղաքացիներ պետք է հասկանանք, որ պետք է ընտրենք այնպիսի քաղաքական ուժի, որն ունի հստակ տեսլական, իսկ գրված ծրագրերն այնպիսին են, որոնց կհավատանք, որովհետև մեծ-մեծ խոսելը մի բան է, կատարել աշխատանք և այդ աշխատանքով հիմք դնել համակարգային փոփոխությունների՝ այլ»,-նշեց մարզպետը:
Հովհաննես Հարությունյանը հիշեցրեց, որ իր ղեկավարած մարզային կառույցում տարբեր պաշտոններ զբաղեցնում են քաղաքական տարբեր հայացքներ ունեցող մարդիկ, ինչը երբեք աշխատանքին չի խանգարել, իսկ եթե եղել են, կամ կլինեն պաշտոնանկություններ, ապա դրանք պայմանավորված կլինեն միայն ու միայն աշխատանքով:
Խոսելով ընտրակաշառքի վերաբերյալ շրջանառվող տեղեկությունների մասին, մարզպետը նշեց`իրավապահ մարմիններն ու լրատվամիջոցները պետք է աչալուրջ լինեն:
Առողջապահության նախկին փոխնախարարը նշանակվեց Շիրակի մարզպետ
«Մենք` որպես քաղաքացի, չպետք է լինենք նպատակի ճանապարհին գործիք, այս հարցը պետք է «թասիբի» նշան լինի յուրաքանչյուր քաղաքացու համար, իսկ նման փաստեր ունենալու դեպքում թող իրավապահ մարմիններն արձագանքեն օրենքի ողջ խստությամբ»,-ասաց մարզպետը:
Ինչ վերաբերում է ընտրություններին մասնակցելուն ու ՔՊ–ի ցուցակում ընդգրկվելուն, մարզպետն ասաց, որ դրա մասին հնարավոր կլինի խոսել միայն «Քաղաքացիական պայմանագիր» կուսակցության վարչության որոշումից հետո:
«Իմ ուզած մարդկանց եմ նշանակել». ովքե՞ր են աշխատելու Շիրակի նորանշանակ մարզպետի հետ
