ԵՐԵՎԱՆ, 14 մայիսի- Sputnik. ՀՀ վարչապետի պաշտոնակատար Նիկոլ Փաշինյանը զանգահարել է ՌԴ նախագահ Վլադիմիր Պուտինին։ Երկու երկրների ղեկավարները քննարկել են սահմանների հարցը։ Ինչպես հայտնում են ՌԴ նախագահի մամուլի ծառայությունից, Պուտինը հայտարարել է, որ անհրաժեշտ է խստորեն կատարել եռակողմ հայտարարության պայմանավորվածությունները, առաջին հերթին` հրադադարի ռեժիմի պահպանությունը։
Ռուսական կողմը վերահաստատել է ակտիվ միջնորդական ջանքերը շարունակելու և Երևանի և Բաքվի հետ սերտ կապեր պահպանելու վճռականությունը` տարածաշրջանում կայունություն ապահովելու նպատակով:
Փաշինյանն ընդգծել է տարածաշրջանում առկա խնդիրները բացառապես խաղաղ ճանապարհով լուծելու անհրաժեշտությունը:
Շնորհակալություն հայտնելով Ռուսաստանի Նախագահին՝ նա հանդես է եկել հօգուտ կառուցողական երկխոսության և փոխգործակցության, խնդիրները բացառապես խաղաղ ճանապարհով, քաղաքական և դիվանագիտական միջոցներով լուծելու:
Քննարկվել են նաև Հարավային Կովկասում տնտեսական, տրանսպորտային ու նյութատեխնիկական կապերի վերականգնման խնդիրները:
Պայմանավորվածություն է ձեռք բերվել տարբեր մակարդակներում հետագա շփումների վերաբերյալ:
Հիշեցնենք` ՀՀ ՊՆ մամուլի ծառայությունը հայտնել էր, որ մայիսի 12-ի առավոտյան ադրբեջանական զինուժը, «սահմանների ճշգրտման» հիմնավորմամբ, փորձել է որոշակի աշխատանքներ իրականացնել Սյունիքի սահմանային հատվածներից մեկում, սակայն հայկական ստորաբաժանումների ձեռնարկած միջոցառումներից հետո ադրբեջանական զինվորականները դադարեցրել են այդ աշխատանքները։
Նույն օրը ՀՀ վարչապետի պաշտոնակատար Նիկոլ Փաշինյանն Անվտանգության խորհրդի նիստում հայտարարեց, որ սա Արդբեջանի կողմից դեվերսիայի փորձ է, և որ խնդիրը պետք է կարգավորվի բանակցությունների միջոցով։
ՊՆ–ն մայիսի 13-ին հայտնեց, որ Ադրբեջանը հերթական սադրանքն է իրականացրել Վարդենիսի և Սիսիանի սահմանային հատվածներում։
ԱԽ նիստ կայացավ նաև մայիսի 13-ին։ Փաշինյանը հայտարարեց, որ հանձնարարել է ՀԱՊԿ պայմանագրով նախատեսված խորհրդակցություններ սկսել։
Ադրբեջանցիները մտածված են եկել, իսկ հիմա պետք է գնան իրենց տեղերը. Սյունիքի մարզպետ
