ԵՐԵՎԱՆ, 20 մայիսի - Sputnik. Վատիկանում ՀՀ նախկին դեսպան Միքայել Մինասյանի հրապարակած փաստաթղթում, որը ՀՀ վարչապետի պաշտոնակատար Նիկոլ Փաշինյանը հայտարարեց, թե պատրաստվում է ստորագրել, ՀՀ տարածքների հանձնման մասին խոսք չկա։
Այս մասին այսօր կառավարության նիստից հետո լրագրողների հետ ճեպազրույցում հայտարարեց ՀՀ էկոնոմիկայի նախարարի պաշտոնակատար Վահան Քերոբյանը` խոստովանելով, որ փաստաթուղթն անձամբ չի տեսել։
«Ճիշտն ասած` աշխատանքային պրոցես է, ես այդ ոլորտի մասնագետը չեմ։ Այն տեղեկատվությունը, որը ես ունեմ, ինձ` որպես հայրենասեր մարդու, բավարարում է այս պահին, և ես կարող եմ այդքանով կիսվել ձեզ հետ»,– ասաց Քերոբյանը` կարծիք հայտնելով, որ փաստաթուղթն առաջիկայում կհանրայնացվի, քանի որ դրանում «մեծ խնդիր չկա»։
«Ես չեմ այդ փաստաթղթի հրապարակողը, ես վստահ եմ, որ ճիշտ ժամանակին հանրությունը դրա մասին կտեղեկացվի։ Դուք գիտեք, որ մեր կառավարությունն ամենաբաց կառավարությունն է, որ երբևիցե եղել է Հայաստանում»,– ասաց Քերոբյանը։
Հիշեցնենք, որ Միքայել Մինասյանը մայիսի 19–ին Facebook–ում գրել էր, որ երեկ երեկոյան ավարտվել է Հայաստանի և Ադրբեջանի միջև կնքվելիք նոր հայտարարության փաստաթղթի ձևակերպման աշխատանքը։
Նրա խոսքով` Այդ փաստաթղթում դիվանագիտորեն, գեղեցիկ ձևակերպումներով, ըստ էության, ձևակերպվում է նոր դեմարկացիան՝ Հայաստանի համար աղետալի հետևանքներով։
Ըստ Մինասյանի` դեմարկացիան հիմնված է լինելու երեք սկզբունքի հիման վրա՝ ԽՍՀՄ քարտեզների, աշխարհագրական նպատակահարմարության և այդ պահին եղած իրական պատկերի։ Սրա հետևանքով, ըստ նրա, Նիկոլ Փաշինյանը քննարկման առարկա է դարձրել Տավուշի մարզի 5 գյուղերը և Արարատի մարզի մեկ գյուղն Ադրբեջանին հանձնելը։
«Ահա փաստաթուղթը, որի մասին գրել էի». Միքայել Մինասյանը լուսանկար է հրապարակել
Իսկ այսօր կառավարության նիստում ՀՀ վարչապետի պաշտոնակատար Նիկոլ Փաշինյանը հայտարարեց, որ պատրաստվում է ստորագրել այդ փաստաթուղթը։
