ԵՐԵՎԱՆ, 20 մայիսի -Sputnik. Հայ-ադրբեջանական սահմանին տիրող իրավիճակին ծանոթանալու նպատակով Սյունիքի մարզ են այցելել Հայաստանում ԵՄ պատվիրակության ղեկավար Անդրեա Վիկտորինը, ԵՄ ներկայացուցիչ Ժան Պլեսինգները, Սիլվիա Զիհին և Եվրոպայի երկրների դեսպանները։ Տեղեկությունը հայտնում է Սյունիքի մարզպետարանը։
Մայիսի 20-ին Սյունիք ժամանած եվրոպական երկրների 11 դեսպանների և Եվրամիության 3 ներկայացուցչի ներկայացվել է իրադրությունը հայ-ադրբեջանական սահմանին՝ Սև լճի տարածքում։
Սահմանային գոտի էին այցելել Հայաստանում Չեխիայի դեսպան Բեդրիխ Կոպեցկին, Ֆրասնիայի դեսպան Ժոնաթան Լաքոտը, Գերմանիայի դեսպան Միխայել Բանցհաֆը, Իտալիայի դեսպան Ջիովաննի Դիոնիսին, Լիտվայի դեսպան Ինգա Ստանիտե-Տոլոչկիենեն, Նիդեռլանդների դեսպան Նիկոլաս Յակոբ Սխերմերսը, Լեհաստանի դեսպանի ժամանակավոր պաշտոնակար Քրիստոֆ Բարտզակը, Ռումինիայի դեսպան Կորնել Իոնեսկուն, Սլովակիայի դեսպան Միրոսլավ Հաչեկը, Շվեդիայի դեսպան Պատրիկ Սվենսոնը, Հունաստանի դեսպան Էվանգելոս Տուրնակիսը։
Հիշեցնենք, որ Միքայել Մինասյանը մայիսի 19–ին Facebook–ում գրել էր, որ երեկ երեկոյան ավարտվել է Հայաստանի և Ադրբեջանի միջև կնքվելիք նոր հայտարարության փաստաթղթի ձևակերպման աշխատանքը։
Նրա խոսքով` Այդ փաստաթղթում դիվանագիտորեն, գեղեցիկ ձևակերպումներով, ըստ էության, ձևակերպվում է նոր դեմարկացիան՝ Հայաստանի համար աղետալի հետևանքներով։
Անդրանիկ Քոչարյանը եթերից է իմացել աղմկահարույց փաստաթղթի մասին
Ըստ Մինասյանի` դեմարկացիան հիմնված է լինելու երեք սկզբունքի հիման վրա՝ ԽՍՀՄ քարտեզների, աշխարհագրական նպատակահարմարության և այդ պահին եղած իրական պատկերի։ Սրա հետևանքով, ըստ նրա, Նիկոլ Փաշինյանը քննարկման առարկա է դարձրել Տավուշի մարզի 5 գյուղերը և Արարատի մարզի մեկ գյուղն Ադրբեջանին հանձնելը։
Իսկ այսօր կառավարության նիստում ՀՀ վարչապետի պաշտոնակատար Նիկոլ Փաշինյանը հայտարարեց, որ պատրաստվում է ստորագրել այդ փաստաթուղթը։
