ԵՐԵՎԱՆ, 27 մայիսի – Sputnik. ԱԺ արտաքին հարաբերությունների մշտական հանձնաժողովի` այսօր 13։30-in հրավիրված արտահերթ նիստը որոշվեց անցկացնել դռնփակ ռեժիմով։
Հանձնաժողովի նախագահ, «Իմ քայլը» խմբակցության պատգամավոր Ռուբեն Ռուբինյանի այս առաջարկը միաձայն ընդունվեց հանձնաժողովի անդամների կողմից։
Նշենք, որ հանձնաժողովի նիստը հրավիրվել է ԱԺ անկախ պատգամավորներ Թագուհի Թովմասյանի, Աննա Գրիգորյանի ու Սոֆիա Հովսեփյանի նախաձեռնությամբ` քննարկելու «Ադրբեջանի Հանրապետության կողմից Արցախի Հանրապետության բռնազավթված տարածքների դեօկուպացիայի և արցախյան հիմնախնդրի կարգավորման վերաբերյալ» ԱԺ հայտարարության նախագիծը խորհրդարանի օրակարգում ներառելու հարցը։
Մինչ նիստի դռնփակ հատվածին անցնելը Ռուբեն Ռուբինյանը հայտարարեց, որ այսօր` 15։00-ին, ԱԺ արտաքին հարաբերությունների մշտական հանձնաժողովը ևս մեկ արտահերթ նիստ կգումարի` ԱԺ պաշտպանության ու անվտանգության հարցերի մշտական հանձնաժողովի հետ համատեղ։
«Ներկա կլինեն ԱԳՆ–ից ու ՊՆ–ից ներկայացուցիչներ` քննարկելու համար հայ–ադրբեջանական սահմանին ստեղծված իրավիճակը»,– ասաց Ռուբինյանը։
Նա նաև հայտնեց, որ համատեղ նիստը ևս կանցկացվի դռնփակ ռեժիմով։
Ավելի վաղ հայտնել էինք, որ այսօր առավոտյան ՀՀ Գեղարքունիքի մարզի սահմանային հատվածում, ՀՀ ԶՈւ N զորամասի պահպանության տարածքում ինժեներական աշխատանքներ կատարելիս ադրբեջանական զինված ուժերի զինծառայողների կողմից շրջափակվել և գերեվարվել են ՀՀ ԶՈւ վեց զինծառայողներ։
Հիշեցնենք` ադրբեջանցի զինվորականները մայիսի 12-ից Հայաստանի Սյունիքի մարզում գտնվող Սև լճի տարածքում են և փորձում են ամրապնդվել այնտեղ։ Նմանատիպ իրավիճակ է նաև Գեղարքունիքի մարզի Կութ, Վերին Շորժա և Նորաբակ գյուղերի հատվածում։
Ռուսական կողմի միջնորդությամբ բանակցությունների մի քանի փուլ է կայացել։ Հակառակորդն առայժմ հեռանալու մտադրություն դեռ չունի։ Հայաստանը դիմել է ՀԱՊԿ-ին և ռազմական օգնություն խնդրել Ռուսաստանից։
Ռազմաքաղաքական ղեկավարությունը հայտարարում է, որ ցանկանում է խնդիրը լուծել խաղաղ ճանապարհով, բայց չի բացառում նաև ուժի կիրառման տարբերակը, եթե բանակցությունները արդյունք չտան։
Մայիսի 25-ին Գեղարքունիքի մարզի Վերին Շորժա գյուղի հատվածում հակառակորդի արձակած կրակոցներից զոհվել է զինծառայող, կրտսեր սերժանտ Գևորգ Խուրշուդյանը: