ԵՐԵՎԱՆ, 12 հունիսի - Sputnik. Վարչապետի պաշտոնակատար Նիկոլ Փաշինյանը հաստատեց, որ 15 հայ գերի վերադառնում է Հայաստան։ Փաշինյանն այդ մասին հայտարարեց Գեղարքունիքի մարզի Կարմիր գյուղի բնակիչների հետ հանդիպման ժամանակ։
«Լավ լուր ունեմ` մեր գերեվարված եղբայրներից 15-ը վերադառնում են Հայաստանի Հանրապետություն։ Սակայն ավելի մանրամասն հայտարարություն անել չեմ կարող` նրանք ճանապարհին են։ Երբ կլինեն ՀՀ տարածքում, ավելի մանրամասն կխոսեմ այդ մասին»,–ասաց Փաշինյանը։
Նրա խոսքով`շուտով Գավառում կայանալիք հանդիպմանը կխոսի այդ մասին մանրամասն։ Փաինյանը նշեց` այս պահին մեր խնդիրն է մեր տղաներին ընդունել ու հասցնել իրենց տներ։
Վարչապետի պաշտոնակատարը հավելեց` պետք է անմիջապես զբաղվել մյուսների վերադարձով, և որևէ մեկը չպետք է կասկածի, որ մյուսներին էլ են վերադարձնելու։
«Ուզում եմ նախապես ներողություն խնդրել այն ընտանիքներից, ում զավակներն այսօր չեն վերադառնում, և նրանք դեռ պետք է սպասեն։ Ցավոք, մենք չենք կարողանում բոլորին վերադարձնել։ Իհարկե, այսօր 15 ընտանիք իրենք երջանիկ կզգան, բայց մյուսների համար սպասման բեռն ավելի ծանր գուցե կդառնա»,–ասաց Փաշինյանը։
Նշենք, որ ղարաբաղյան հակամարտության գոտում հրադադարի հաստատումից հետո Ադրբեջանում պահվող գերիների և պատանդների վերադարձի հարցը վերջնականապես չի լուծվում։ Ադրբեջանը չի շտապում վերադարձնել բոլոր գերիներին։
Հայ գերիների դատավարության արդյունքները միջազգայնորեն չեն կարող ընդունվել. իրավապաշտպան
Ավելին` 26 հայ ռազմագերիների ներկայացրել է որպես դիվերսանտներ և համապատասխան մեղադրանք առաջադրել։
Անցած ժամանակահատվածում փոխանակման ընդամենը մի քանի դեպք է եղել, և բացի այս, հայրենիք են վերադարձել 69 հայ զինվորականներ և քաղաքացիական անձինք: Ըստ իրավապաշտպանների` Ադրբեջանում ավելի քան 200 հայ գերի կա։
Հայտնի են դարձել 26 հայ գերիների անունները, որոնց մեղադրանք է առաջադրվել Ադրբեջանում
