ԵՐԵՎԱՆ, 14 հունիսի - Sputnik. ՀՀ վարչապետի պաշտոնակատար Նիկոլ Փաշինյանը Արարատի մարզի Մասիս քաղաքում համակիրների հետ հանդիպման ժամանակ հայտարարեց, որ պատրաստվում են 2022 թվականից ծնված ամեն երրորդ ու հաջորդ երեխային ամիսը վճարել 50 հազար դրամ նպաստ մինչև երեխայի չորս տարեկանը լրանալը։
«Ես նպաստ ասեցի՞, նպաստը լավ բառ չի, մենք պետական տուրք ենք վճարելու երեխային», -ասաց Փաշինյանը՝ նշելով, թե այս մասին այսօր առաջին անգամ է հայտարարում։
Հիշեցնենք` այսօրվա դրությամբ երեխայի խնամքի նպաստը տրամադրվում է յուրաքանչյուր ամիս 26,500 դրամի չափով մինչև երեխայի երկու տարեկան դառնալը։ Նպաստը վճարվում է այն ծնողներին, որոնք վարձու աշխատողներ են և գտնվում են մինչև երեք տարեկան երեխայի խնամքի արձակուրդում։
Հայաստանում մինչև երկու տարեկան երեխայի խնամքի նպաստը նշանակվում է նաև գյուղական բնակավայրի հասցեով հաշվառված և փաստացի բնակվող ծնողին (եթե երեխան ծնվել է 2020թ․ հուլիսի 1-ին կամ հետո), որը երեխայի ծննդյան կամ խնամքի նպաստի համար դիմելու օրվա դրությամբ՝ առնվազն մեկ տարի անընդմեջ հաշվառված է գյուղական բնակավայրի հասցեով:
Գյուղաբնակ ծնողին ևս խնամքի նպաստը վճարվում է 26,500 դրամի չափով՝ մինչև երեխայի երկու տարեկան դառնալը։ Եթե գյուղական բնակավայրում ապրող ծնողը միաժամանակ վարձու աշխատող է, ապա վճարվում է 53,000 դրամ խնամքի նպաստ։
