ԵՐԵՎԱՆ, 18 հունիսի - Sputnik. Ազգային ժողովի արտահերթ ընտրություններին ընդառաջ դատախազությունը տեղեկություններ է հրապարակել առերևույթ ընտրական հանցագործությունների մասին ստացված հաղորդումների ու առկա արդյունքների մասին։ Մասնավորապես հունիսի 18-ի ժամը 9.00-ի դրությամբ ստացվել է ընդհանուր 231 հաղորդում: Գլխավոր դատախազության մամուլի ծառայության տեղեկացմամբ՝ դրանցից 76-ը ԶԼՄ հրապարակումներ են, 64-ը՝ ֆիզիկական անձանցից, այդ թվում՝ նաև դատախազության թեժ գծի միջոցով ստացված, 52-ը՝ սոցիալական ցանցերում օգտատերերի գրառումներ, 39-ը՝ ոստիկանության աշխատակիցների ստացած օպերատիվ տվյալներ:
Առերևույթ հանցավոր իրավախախտումների մասին հաղորդումներից և ահազանգերից 118-ը վերաբերում է ընտրակաշառք տալուն, ստանալուն կամ ընտրակաշառքի միջնորդությանը (ՀՀ քրեական օրենսգրքի 154.2-րդ հոդված),
44-ը՝ ընտրական իրավունքի իրականացմանը խոչընդոտելուն (ՀՀ քրեական օրենսգրքի 149 հոդված),
30-ը՝ քարոզչությանը մասնակցելուն հարկադրելուն կամ խոչընդոտելուն (ՀՀ քրեական օրենսգրքի 149.1-րդ հոդված),
25-ը՝ ընտրական քարոզչության և նման բնույթի այլ պաստառների հետ կապված գույքային վնասներ հասցնելուն (ՀՀ քրեական օրենսգրքի 185-րդ հոդված)
14-ը՝ այլ (ՀՀ քրեական օրենսգրքի 177, 137, 118, 164-րդ և 308-րդ հոդվածներ)։
«Ենթադրյալ ընտրական իրավախախտումների վերաբերյալ 152 հաղորդում, որոնք բնույթով եղել են վերացական և ընդհանրական, ուղարկվել են ՀՀ ոստիկանություն՝ դրանցով անհրաժեշտ ստուգողական գործողություններ կատարելու համար: Իրականացված օպերատիվ-հետախուզական աշխատանքների արդյունքում նշվածներից 41-ում առկա տեղեկությունները չեն հաստատվել և թողնվել են անհետևանք, իսկ 111-ով ստուգողական գործողությունները շարունակվում են»,- նշված է հաղորդագրության մեջ։
229 հաղորդումներից 78-ն ուղարկվել են հետաքննության կամ նախաքննության մարմիններ սահմանված կարգով նյութեր նախապատրաստելու նպատակով: Արդյունքում դրանցից 16-ով որոշում է կայացվել քրեական գործ հարուցելը մերժելու մասին, 49-ով նյութերի նախապատրաստման գործընթացը շարունակվում է, իսկ 14 դեպքի առթիվ հարուցվել են քրեական գործեր:
Մասնավորապես քրեական գործերից 8-ը հարուցվել են ՀՀ քրեական օրենսգրքի 154.2-րդ, 154.9-րդ, 34-154.2-րդ հոդվածների տարբեր մասերով,
2-ը՝ ՀՀ քրեական օրենսգրքի 149.1-րդ հոդվածի տարբեր մասերով,
1-ը՝ ՀՀ քրեական օրենսգրքի 149-րդ հոդվածի 2-րդ մասի 1-ին և 2-րդ կետերով
3-ը՝ կապված պաստառների վնասման հետ՝ ՀՀ քրեական օրենսգրքի 185-րդ հոդվածի տարբեր մասերի հատկանիշներով:
Հարուցված քրեական գործերից 4-ով 13 անձի առաջադրվել են մեղադրանքներ։ Նրանցից 7-ը մեղադրվում են ընտրակաշառք վերցնելու, 6-ը՝ ընտրակաշառք տալու և ընտրակաշառք տալու փորձի համար, 2 անձ ունի կասկածյալի կարգավիճակ, որոնցից մեկը՝ ընտրակաշառք ստանալու, մեկը՝ ընտրական քարոզչությանը մասնակցելուն հարկադրելու և մասնակցելուն խոչընդոտելու կասկածանքով: 5 անձ էլ կալանավորվել է:
ՀՀ գլխավոր դատախազությունը ստացել է նաև ընտրություններին և ընտրական իրավունքին վերաբերող 18 այլ դիմումներ։ Թեպետ դրանք ՀՀ քրեական օրենսգրքով նախատեսված հանցագործության մասին տվյալներ չեն պարունակել, սակայն առանձին դեպքերում դիմումն ուղարկվել է ՀՀ կենտրոնական ընտրական հանձնաժողովի քննարկմանը:
Հիշեցնենք` Հայաստանում ԱԺ արտահերթ ընտրությունները նախատեսված են հունիսի 20-ին։
Տեխնիկական սխալ է եղել. Beeline-ը խնդրում է անտեսել քաղաքական հաղորդագրությունը
