ԵՐԵՎԱՆ, 28 հունիսի – Sputnik. Առողջապահության նախարարի պաշտոնակատար Անահիտ Ավանեսյանը ստացել է կորոնավիրուսային հիվանդության դեմ պատվաստման 2-րդ դեղաչափը: Տեղեկությունը հայտնում է նախարարության ֆեյսբուքյան էջը։
Նշենք, որ այսօր իր 2–րդ դեղաչափը ստացել է նաև ՀՀ փոխվարչապետի պաշտոնակատար Տիգրան Ավինյանը։
Ե՛վ Ավինյանը, և՛ Ավանեսյանը կորոնավիրուսային հիվանդության դեմ պատվաստման 1-ին դեղաչափը ստացել էին ապրիլի 28–ին։ Նրանք պատվաստվել են «AstraZeneca» պատվաստանյութով։
Նախարարությունից նաև հիշեցնում են`
պատվաստումից առաջ որևէ հետազոտության անհրաժեշտություն չկա,
եթե հարցման, անամնեզի և ստուգաթերթի լրացման արդյունքում չկա հակացուցում, ապա կատարվում է պատվաստումը,
ցանկացած ախտանշանի կամ գանգատի դեպքում քաղաքացին ուղարկվում է հետազոտության,
հղիության թեստի անհրաժեշտություն նույնպես չկա,
1-ին դեղաչափից հետո՝ մինչ իմունիտետի ձևավորումը, ժամանակ է անհրաժեշտ, այդ պատճառով հնարավոր է վարակվել,
2-րդ դեղաչափն ապահովում է առավելագույն պաշտպանություն:
COVID-19-ի դեմ պատվաստանյութերից որևէ մեկը չի պարունակում կենդանի վիրուս, ինչը նշանակում է, որ դրանք չեն կարող առաջացնել կորոնավիրուսային հիվանդություն։
