Փաշինյանը ներկայացրել է նորանշանակ նախարարին, վերջինս խոստում է տվել վարչապետին. տեսանյութ
14:56 04.08.2021 (Թարմացված է: 14:59 04.08.2021)
© Photo / official site of the Prime minister of RA
Բաժանորդագրվել
ՀՀ վարչապետն արդարադատության նախարարությունում անդրադարձել է պարեկային ոստիկանության թեմային։
ԵՐԵՎԱՆ, 4 օգոստոսի – Sputnik. ՀՀ վարչապետ Նիկոլ Փաշինյանն այցելել է արդարադատության նախարարություն և աշխատակազմին ներկայացրել նորանշանակ նախարար Կարեն Անդրեասյանին: Տեղեկությունը հայտնում է վարչապետի մամուլի ծառայությունը։
Վարչապետը շնորհակալություն է հայտնել նախկին նախարար Ռուստամ Բադասյանին՝ կատարած աշխատանքի համար և շնորհավորել Կարեն Անդրեասյանին արդարադատության նախարար նշանակվելու առիթով: Վարչապետը կարևորել է արդարադատության ոլորտում իրականացվող բարեփոխումները և նշել, որ ի վերջո արդարության և արդարադատության ներկայության զգացումն ամենակարևոր խնդիրներից է, որ ժողովուրդն իշխանություններին առաջադրել է դեռևս 2018 թվականի հեղափոխության ժամանակ:
«Իհարկե, այս ընթացքում կատարվել է հսկայական աշխատանք, ընդունվել են ռազմավարություններ, որոնցից բխող մի շարք միջոցառումներ արդեն կյանքի են կոչվել: Պարոն Անդրեասյանի հետ մեր խոսակցությունը եղել է հետևյալի մասին, որ պետք է ապահովվի քաղաքականության շարունակականությունը: Մյուս կողմից՝ պետք է այսպիսի կադրային որոշումներով փորձենք նոր լիցք և խթան հաղորդել արդեն իսկ կայացրած մեր որոշումներին, ընդունված ռազմավարությունների իրականացմանը»,- ասել է Նիկոլ Փաշինյանը:
Կառավարության ղեկավարն արդարադատության նախարարության գործունեության համատեքստում կարևորել է Պարեկային ոստիկանության ներդրման գործընթացը, որում գերատեսչությունն ակտիվ մասնակցություն է ունեցել, քաղաքականության մշակման գործառույթն իրականացրել է նախարարությունը:
«Քանի դեռ ոլորտում քաղաքականություն մշակող մարմին չունենք, այսինքն՝ նախարարությունը ձևավորված չէ, արդարադատության նախարարությունը բարեփոխման բովանդակային ապահովումը պիտի իրականացնի: Մենք Պարեկային ոստիկանության ներդրման առաջին օրերից մթնոլորտի կարևոր փոփոխություն ենք տեսել, բայց նաև արձանագրել ենք պրակտիկ մի շարք խնդիրներ, որոնք պիտի լրջորեն ուսումնասիրվեն, Երևանի ռեզերվային ընդունելության ուսուցման գործընթացներում հաշվի առնվեն, որպեսզի արդեն Շիրակի և Լոռվա մարզերում Պարեկային ոստիկանության ծառայողները հենց ծառայության մեկնարկի առաջին րոպեներից ամբողջությամբ տիրապետեն խնդիրը, ներառյալ՝ նրանք, որոնք ի հայտ են եկել Երևանի պարեկային ոստիկանության գործարկման ճանապարհին»,- ասել է Փաշինյանը:
Премьер-министр Никол Пашинян представил аппарату министерства юстиции новоназначенного министра Карена Андреасяна (4 апреля 2021). Еревaн
© Photo / official site of the Prime minister of RA
Արդարադատության նորանշանակ նախարար Կարեն Անդրեասյանը շնորհակալություն է հայտնել վարչապետին մեծ վստահության և պատասխանատու փաթեթն իրեն վստահելու համար:
«Պարոն վարչապետ, ուզում եմ խոստանալ, որ մեր այս երիտասարդ ու շատ կարող թիմի հետ կկարողանանք ի վերջո արդարությունը բերել բոլորին ամբողջ երկրում: Շնորհակալ եմ վստահության համար»,- նշել է Կարեն Անդրեասյանը:
Ամփոփելով՝ վարչապետ Փաշինյանը կարևորել է արդարադատության ոլորտի և դատական համակարգի բարեփոխումները:
