Դիանա Հարությունյան, Sputnik.
Դավիթ Բաբայանը կարծում է, որ բլոգեր Լապշինն իրեն իսկական տղամարդու,ազնիվ մարդու նման է պահել: Նա ոչ թե լռեց, այլ ճշմարտությունը ցույց տվեց ամբողջ աշխարհին:
«Լապշինը հայ չէ, այլազգի է, այլ պետության քաղաքցի: Նա սկզբունքային մարդ է, իր խոսքի տեր: Լապշինի գործունեությունը փաստում է, որ ինքը կաշառք չի վերցրել, թե չէ խավիրաի հոտով տարված, ճշմարտությունը չէր ներկայացնի: Այն ինչ կատարվեց Լապշինի հետ, Հոլոքոստի շարունակությունն էր Ադրբեջանում»,-ասում է Դավիթ Բաբայանը:
Արցախի նախագահի մամուլի խոսնակը խորհուրդ է տալիս ուշադիր հետևել Լապշինի գործին: «Լապշինը պետք է դիմի Մարդու իրավունքների եվրոպական դատարան, մենք պետք է հետևենք, չքաղաքականացնենք այս գործը, որովհետև սա ավելի շատ մարդասիրական իրավունքից է»,-ասում է Բաբայանն ու փորձում պատկերացնել, թե ինչ կլինի, եթե ադրբեջանցիների ձեռքում հայ մարդ հայտնվի: Եթե նրանք այսքան դաժան են վարվում այլազգու հետ, ինչպես կպահեին իրենց, եթե Լապշինը հայ լիներ:
Դավիթ Բաբայանը նաև ասում է, որ եթե քաղաքակիրթ հանրությունն աչքերը փակի և կրկին շարունակի Բաքվում միջազգային մրցույթներ անցկացնել, կնշանակի աշխարհում հաղթել է նացիզմը, ֆաշիզմը: