Ֆուտբոլի աշխարհի առաջնության վերջին խաղերը գոլառատ ստացվեցին: Միայն G խմբի երկու խաղերում գրանցվեց դարպասի 14 գրավում: Բելգիան 5:2 հաշվով հաղթեց Թունիսին, իսկ Անգլիայի հավաքականը 6:1 հաշվով առավելության հասավ Պանամայի թիմի նկատմամբ: Այս երկու հավաքականներն էլ ապահովեցին իրենց տեղը 1/8 եզրափակիչում:
G խմբում ամեն ինչ ընթացավ ըստ նախնական կանխատեսումների: Ֆավորիտները հեշտությամբ կարողացան կատարել նվազագույն առաջադրանքը: Բայց անակնկալներով հարուստ այս մրցաշարում ամենայն հավանականությամբ դեռ անսպասելի արդյունքներ կգրանցվեն:
Մասնավորապես ո՞վ կարող էր ենթադրել, որ աշխարհի գործող չեմպիոն Գերմանիայի հավաքականի 1/8 դուրս գալը կլինի մեծ հարցականի տակ: Տոնի Կրոսի սառնասրտությունն ու հիանալի վարպետությունը փոխեցին Գերմանիայի հավաքականի արդյունքը և գուցե նաև առաջնության ընթացքը: Համենայնդեպս դժվար էր պատկերացնել, որ 1/8 չի լինելու Յոհիմ Լյովի թիմը: Իսկ առաջնության այդ փուլում խաղալու համար Գերմանիային հարկավոր է վերջին տուրում հաղթանակի հասնել միավոր չվաստակած ու խաղամակարդակով թույլ Հարավային Կորեայի հավաքականի նկատմամբ:
Խմբային փուլի երկրորդ տուրից հետո արդեն հայտնի են ինն անհաջողակները, որոնց համար երրորդ խաղի արդյունքը ոչ մի նշանակություն չունի: Բայց եթե Պանամայի, Հարավային Կորեայի, Կոստա Ռիկայի կամ էլ Պերուի հավաքականների այդպիսի արդյունքը սպասելի էր` հաշվի առնելով, թե ինչ մրցակիցների հետ էին խաղալու, ապա Լեհաստանի հավաքականի ձախողումը առաջնության հերթական անակնկալն էր: Նավալկայի թիմը, իր կազմում ունենալով Եվրոպայի լավագույն ռմբարկունից մեկին՝ Ռոբերտ Լևանդովսկուն, երկու խաղերում խփեց մեկ գնդակ ու կրեց երկու պարտություն:
Հունիսի 25-ին կայանալու են խմբային փուլի վերջին հանդիպումները A և B խմբերում: Եթե A խմբում Ռուսաստանն ու Ուրուգվայը վիճարկուն են խմբի հաղթողին, ապա B խմբում երեք հավաքականներ հավակնում են դուրս գալ 1/8 եզրափակիչ: Այդ առումով շատ հետաքրքիր մրցավեճ է սպասվում Իրանի ու Պորտուգալիայի միջև: Եվրոպայի գործող չեմպիոն հավաքականի համար Իրան ընտրանին հաստատ նվեր չէ, բայց Կառլուշ Կեյռուշի թիմին միայն հաղթանակը դուրս կբերի հաջորդ փուլ:
Առաջնության համար շատ կարևոր խաղային օր է համարվելու հունիսի 26-ը: Երեքշաբթի կիմանանք` աշխարհի առաջնությունում իր ելույթները շարունակելու է արդյոք Լեո Մեսին ու նրա հավաքականը, թե ոչ: Շատերն արդեն հասցրել են սուր քննադատության ենթարկել Արգենտինային հավաքականի խաղը, մարզիչ Խորխե Սամպաոլիին ու Մեսին (ընդ որում այս քննադատությունը արդարացի է): Բայց որպես վիճակագրություն նշենք, որ մրցակցի դարպասին ուղղված հարվածներով, բոլոր խմբերի երկու հանդիպումներից հետո առաջատարը Մեսին է, որ կատարել է 12 հարված: Մյուս կողմից էլ այդ հարվածների առյուծի բաժինն արդյունավետ չէ եղել: Բավական է նշել, որ Արգենտինան միայն մեկ գոլ է խփել երկու խաղերում:
Ի տարբերություն Արգենտինայի, Հարավային Ամերիկան ներկայացնող մյուս հավաքականը՝ Բրազիլիան բոլոր հնարավորություններն ունի նախ խմբային փուլը հաղթահարելու, հետո էլ աշխարհի չեմպիոնի վեցերորդ տիտղոսի համար պայքարելուն: Բայց խմբի վեջին խաղում Բրազիլիային դժվար խաղ է սպասվում սերբերի հետ, որոնք հաղթանակի դեպքում կարող են շրջանցել պենտակամպիոններին:
