18:41 22 օգոստոսի 2019
Ուղիղ եթեր
  • USD475.91
  • GBP577.33
  • EUR527.40
  • RUB7.25
Мусорная свалка в Нубарашене

Թունավորումն այսուհետ վճարովի կլինի. ի՞նչ են նախագծել գործադիրում

© Sputnik / Aram Nersesyan
Հեղինակներ
Ստանալ կարճ հղումը
Արմեն Հակոբյան
387 0 0

Բնապահպանական խնդիրները, որ առաջանում են կենցաղում մարդկանց օգտագործած պոլիէթիլենային տոպրակներից, օր օրի ահագնանում են: Ամբողջական դաշտեր ու սարեր Հայաստանում ծածկված են ցելոֆանե թաղանթներով, որոնք քամու դեպքում սատանայական պար են բռնում երկնքում:

Շրջանառության մեջ է դրվել բնապահպանության նախարարության մշակած նախագծերի փաթեթ, որով նախատեսվում է քայլ առ քայլ հրաժարվել պոլիէթիլենային տոպրակներից ու պարկերից: Առաջին հերթին սա պետք է որ ուրախալի լուր լինի բնության պահպանության խնդիրներով գործնականում մտահոգ հայրենակիցների համար, որոնք տևական ժամանակ բարձրաձայնում էին պոլիէթիլենային կամ ինչպես հաճախ նշում ենք՝ ցելոֆանե տոպրակներից հրաժարվելու անհրաժեշտության ու կարևորության մասին:

Թե ինչ չարիք են դարձել դրանք, թերևս ամեն անգամ հատուկ մանրամասնելու կարիք չկա: Բավական է մի թեթև քամի փչի ու ցանկացած բնակավայրում խնդիրն ակնհայտ է դառնում: Չհաշված արդեն այն, որ բնաշխարհի նույնիսկ ամենից հեռավոր անկյուններում արդեն կարող ես առանց մեծ ջանքերի տեսնել ժամանակակից քաղաքակրթության այդ «հետքերը»:

Իսկ ի՞նչ է առաջարկվում բնապահպանության նախարարության ներկայացրած նախագծերով:

Առաջինը՝ նախատեսվում է արդեն այս տարվա հուլիսի 1-ից արգելել պոլիէթիլենային տոպրակների անվճար տրամադրումը, իսկ ևս մեկ տարի անց՝ 2020-ի հուլիսի 1-ից դրանց օգտագործման համար հատուկ հարկ սահմանել: Առաջարկվում է դրանից ևս 2 տարի անց՝ 2022-ից արդեն ամբողջությամբ արգելել այդ տոպրակների ու պարկերի վաճառքը Հայաստանում:

Դժվար է միարժեքորեն նշել, թե պոլիէթիլենային տոպրակների տրամադրումը պարտադիր-վճարովի դարձնելը, ապա հատուկ հարկ սահմանելը որքանո՞վ կնպաստի դրանց օգտագործման ծավալների կրճատմանը: Օրինակ, հիմա էլ տարբեր սուպերմարկետներում նման տոպրակները վաճառվում են, միջին տարողության 1 հատ տոպրակը՝ 10 դրամով: Դա աննշան ծախս է գրեթե: Համենայն դեպս, սուպերմարկետներից օգտվող կամ վճարունակ գնորդների համար:

Բայց, հնարավոր է, երբ 1 տոպրակի գինը դառնա 50 կամ 100 դրամ, գնել-օգտագործելու ցանկությունը որոշակիորեն նվազի:

Հասկանալի է, իհարկե, որ նախագծերի վերաբերյալ դեռ մի շարք առաջարկություններ և կարծիքներ կհնչեն, որոշակի շտկումներ ու փոփոխություններ էլ կարվեն, մինչև դրանք օրենք դառնան: Առավել ևս, ինչպես նշված է նախարարության տարածած հաղորդագրության մեջ, մարտի 5-ին նախատեսվում է հանդիպում այս խնդրով շահագրգիռ բոլոր կողմերի հետ, հասկանալի է, օրենքի նախագծերի փաթեթը քննարկելու նպատակով:

Կարևոր է, որ աստիճանական մոտեցում է որդեգրված, այսինքն՝ փուլ առ փուլ է նախատեսվում դուրս մղել պոլիէթիլենային տոպրակները մեր կենցաղից, հանրագումարում՝ շրջակա միջավայրից:

Սա կարևոր է հատկապես այն տեսանկյունից, որ նման տոպրակների հայրենական արտադրողներն էլ հասցնեն վերասարքավորել իրենց ձեռնարկությունները՝ անցնելով այլ գործունեության, հնարավոր է՝ այլ նյութերից (թուղթ, կտոր) տոպրակների և պարկերի թողարկման:

Զուգահեռաբար, իհարկե, պետք է սպասել լրացուցիչ քայլերի և նախաձեռնությունների՝ նախ, շրջակա միջավայրում հայտնված պոլիէթիլենային աղբն ու թափոնը չեզոքացնելու և վերամշակելու, ինչպես նաև՝ պլաստիկե իրերից աստիճանաբար ձերբազատվելու ուղղությամբ:

Ըստ թեմայի

Քաղաքական «ջոկողություն», կամ նախարարները միայն «Իմ քայլինը» չեն
Հայաստանի օրհներգը հանգիստ չի տալիս. մինչև օրհներգը չփոխենք, ոչ մի գործ գլուխ չի գա՞
«Ասա՛ ինձ անունդ, հանքատե՛ր». միգուցե միանգամից ազգայնացնե՞նք
Անպետք պետքարան կամ «բուրումնավետ» լայվ. երբ նախարարը մտնում է ավտոկայանի զուգարան
թեգերը:
ՀՀ կառավարություն, Հայաստան

Գլխավոր թեմաներ